రియాద్: ఏప్రిల్ 18 నుండి మే 31వరకు 'నుసుక్' (Nusuk) ప్లాట్‌ఫారమ్ ద్వారా ఉమ్రా అనుమతులను జారీ చేయడాన్ని సౌదీ అరేబియా నిలిపివేసింది.  అలాగే, నేటి నుండి మక్కా నగరంలోకి ప్రవేశంపై కూడా ఆంక్షలు అమల్లోకి వస్తాయని తెలిపింది. మే 25 నుండి మే 30 మధ్య జరగనున్న ఈ ఏడాది హజ్ సీజన్ కోసం సౌదీ సన్నాహాలు ప్రారంభించిన నేపథ్యంలో ఈ మేరకు ప్రకటనను విడుదల చేసింది.

ఈ హజ్ సీజన్ సన్నాహక చర్యల్లో భాగంగా.. యాత్రికుల భద్రతను పురస్కరించుకుని సౌదీ అంతర్గత వ్యవహారాల మంత్రిత్వ శాఖ (Ministry of Interior) కొత్త నిబంధనల జాబితాను ప్రకటించింది.

అనుమతి లేకుండా మక్కాలోకి ప్రవేశం లేదు

మక్కాలోకి ప్రవేశించాలనుకునే వారు సంబంధిత అధికారుల నుండి అనుమతులను  పొందిన తర్వాత మాత్రమే నగరంలోకి అడుగుపెట్టగలరు. కింది అర్హతలు కలిగిన వ్యక్తులు నగరంలోకి ప్రవేశించడానికి అనుమతి ఉంటుంది:

- మక్కాలో జారీ చేయబడిన నివాస అనుమతి (Residency permit) కలిగిన వారు

- పవిత్ర స్థలాల సందర్శన కోసం జారీ చేయబడిన హజ్ అనుమతి లేదా పని అనుమతి (Work permit) కలిగిన వారు

ఈ హజ్ సీజన్ సమయంలో సౌదీ అరేబియా పాస్‌పోర్ట్‌ల జనరల్ డైరెక్టరేట్ (General Directorate of Passports), నివాస కార్మికుల కోసం మక్కా ప్రవేశ అనుమతి దరఖాస్తులను స్వీకరించడం ప్రారంభించింది. ఈ దరఖాస్తులను 'అబ్షర్' (Absher) మరియు 'ముకీమ్' (Muqeem) పోర్టల్‌ల ద్వారా సమర్పించవచ్చు.

GCC పౌరులు, సౌదీ అరేబియాలో 'ప్రీమియం రెసిడెన్సీ' కలిగిన వారు.. పెట్టుబడిదారులు, సౌదీ పౌరుల తల్లులు, గృహ కార్మికులు మరియు సౌదీయేతర కుటుంబ సభ్యులు 'అబ్షర్ ఇండివిడ్యువల్స్' (Absher Individuals) ప్లాట్‌ఫారమ్‌ను ఉపయోగించుకోవచ్చు.

- మక్కా కేంద్రంగా పనిచేసే సంస్థల ఉద్యోగులు 'ముకీమ్' (Muqeem) పోర్టల్‌ను ఉపయోగించవచ్చు.

- హజ్ వీసా లేని ఏ ఒక్కరికీ మక్కాలో ప్రవేశం లేదా స్టే చేయడానికి అనుమతి ఉండదని మంత్రిత్వ శాఖ స్పష్టం చేసింది.

ఉమ్రా వీసాదారులకు దేశం విడిచి వెళ్ళడానికి గడువు

ఉమ్రా వీసాపై వచ్చినవారు సౌదీ విడిచి వెళ్ళడానికి చివరి తేదీ ఏప్రిల్ 18.

గతంలో రమదాన్ 8వ తేదీన (ఫిబ్రవరి 25) తమ ఉమ్రా వీసాల గడువు ముగిసినవారు, తమ వీసాలను పొడిగించుకోవాల్సిన అవసరం లేకుండానే ఏప్రిల్ 18లోపు అంతర్జాతీయ ప్రవేశ మార్గాల ద్వారా ఎప్పుడైనా దేశం విడిచి వెళ్ళవచ్చని సౌదీ హజ్ మరియు ఉమ్రా మంత్రిత్వ శాఖ ప్రకటించింది.  

'నుసుక్' (Nusuk) ద్వారా ఉమ్రా అనుమతుల జారీ నిలిపివేత

ఏప్రిల్ 18 నుండి మే 31 వరకు 'నుసుక్' వేదిక ద్వారా ఉమ్రా అనుమతులను జారీ చేయడం నిలిపివేయబడుతుంది.

జరిమానాలు  

ఈ నిబంధనలను ఉల్లంఘించినట్లయితే చట్టపరమైన జరిమానాలు విధించబడతాయని సౌదీ అంతర్గత వ్యవహారాల మంత్రిత్వ శాఖ తెలిపింది.