మనామాః బహ్రెయిన్ లో గడువు ముగిసిన గృహ రుణ అర్హత సర్టిఫికేట్లను మరో మూడు నెలల పాటు పొడిగించారు. ఈ మేరకు గృహ మరియు పట్టణ ప్రణాళిక మంత్రిత్వ శాఖ ప్రకటించింది. ఈ నిర్ణయం ఈ సంవత్సరం మార్చి మరియు ఏప్రిల్ నెలల్లో గడువు ముగిసిన అన్ని సర్టిఫికేట్లకు వర్తిస్తుందన్నారు.

ప్రస్తుత అసాధారణ పరిస్థితులలో, ముఖ్యంగా లబ్ధిదారులు గృహ రుణం పొందేందుకు అవసరమైన అర్హతలను మరింత సులభంగా పూర్తి చేయడానికి సహాయపడేలా ఈ చర్య తీసుకున్నట్లు మంత్రిత్వ శాఖ పేర్కొంది. ఈ చర్య  సర్టిఫికేట్ గడువు ముగిసిన తర్వాత కూడా పౌరులు గృహ రుణ సేవలను సజావుగా పొందేందుకు వీలు కల్పిస్తుంది. ఈ ఆటోమెటిక్ పునరుద్ధరణలో అన్ని కేటగిరీలలోని “తస్’హీల్”, “తస్’హీల్ ప్లస్” మరియు రెండు రకాల “మజాయా” కార్యక్రమాలతో సహా అనేక కీలక ఫైనాన్సింగ్ కార్యక్రమాలు ఉన్నాయని తెలిపింది.
మంత్రిత్వ శాఖ ప్రకారం.. సర్టిఫికేట్ చెల్లుబాటును పొడిగించడం వల్ల, గృహ యూనిట్లను ఎంచుకోవడం లేదా రుణదాత అవసరాలను తీర్చడం వంటి ప్రక్రియలను ఖరారు చేయడానికి లబ్ధిదారులకు అదనపు సమయం లభిస్తుంది. దీనివల్ల సామర్థ్యం మెరుగుపడి, దరఖాస్తుదారులు ఎదుర్కొనే పరిపాలనాపరమైన సవాళ్లు తగ్గుతాయని భావిస్తున్నారు.