అమెరికా: అమెరికా అధ్యక్షుడు డొనాల్డ్ ట్రంప్ ఇరాన్‌తో నెలకొన్న ఉద్రిక్త పరిస్థితుల నేపథ్యంలో కీలక నిర్ణయం తీసుకున్నారు. పాకిస్థాన్ చేసిన అభ్యర్థనను పరిగణలోకి తీసుకుంటూ ఇరాన్‌పై అమలులో ఉన్న కాల్పుల విరమణను మరోసారి పొడిగిస్తున్నట్లు ప్రకటించారు. ఈ విషయాన్ని ట్రంప్ తన సోషల్ మీడియా వేదిక ‘ట్రూత్ సోషల్’ ద్వారా వెల్లడించారు.

పాక్ నాయకుల అభ్యర్థన

పాకిస్థాన్ ప్రధాని షెహబాజ్ షరీఫ్ మరియు ఆర్మీ చీఫ్ జనరల్ ఆసిమ్ మునీర్ చేసిన విజ్ఞప్తిని గౌరవిస్తూ ఈ నిర్ణయం తీసుకున్నట్లు ట్రంప్ తెలిపారు. ప్రస్తుతం ఇరాన్ అంతర్గతంగా కఠిన పరిస్థితులను ఎదుర్కొంటోందని, అందుకే మరోసారి చర్చలకు అవకాశం ఇవ్వాలని భావించినట్లు చెప్పారు.

ఒత్తిడి మాత్రం కొనసాగుతుంది

కాల్పుల విరమణను పొడిగించినప్పటికీ ఇరాన్‌పై ఆర్థిక, సైనిక ఒత్తిడి తగ్గించబోమని ట్రంప్ స్పష్టం చేశారు. ఇరాన్ రేవుల దిగ్బంధనం కొనసాగుతుందని, అవసరమైతే అమెరికా సైన్యం దాడులకు సిద్ధంగా ఉందని హెచ్చరించారు.

ఉద్రిక్తతల మధ్య కీలక నిర్ణయం

ఇటీవల అమెరికా-ఇరాన్ మధ్య యుద్ధ మేఘాలు కమ్ముకున్నాయి. ఈ నేపథ్యంలో పాకిస్థాన్ మధ్యవర్తిత్వంతో శాంతి చర్చలు జరిగాయి. అయితే స్పష్టమైన ఒప్పందం కుదరకపోవడంతో పరిస్థితి ఇంకా ఉద్రిక్తంగానే ఉంది. ప్రస్తుతం కాల్పుల విరమణ పొడిగింపుతో యుద్ధం ముప్పు తాత్కాలికంగా తప్పినట్లయింది.