రియాద్: జాతీయ ఐక్యతకు, ప్రజా భద్రతకు హానికరంగా భావించే సోషల్ మీడియా కంటెంట్‌ పై సౌదీ అరేబియా కఠిన చర్యలు చేపట్టింది. ఇలాంటి కంటెంట్ ను వ్యాప్తి చేయడంలో పాలుపడిన వ్యక్తులపై చట్టపరమైన చర్యలు తీసుకున్నట్లు సౌదీ అరేబియా అంతర్గత వ్యవహారాల మంత్రిత్వ శాఖ తెలిపింది.

జాతీయ ఐక్యత, సామాజిక శాంతికి భంగం కలిగించే అంశాలను ప్రస్తావిస్తూ..  గిరిజన విభజనను రెచ్చగొట్టే వ్యాఖ్యలతో సహా సోషల్ మీడియా వేదికలపై పంచుకున్న కంటెంట్‌ను తాము పర్యవేక్షించినట్లు మంత్రిత్వ శాఖ ఒక అధికారిక ప్రకటనలో తెలిపింది. చట్టాలు, నిబంధనలకు అనుగుణంగా ఇందులో ఉన్న వారిపై చట్టపరమైన చర్యలు ప్రారంభించినట్లు వెల్లడించింది.

సున్నితమైన అంశాలను వాడుకోవడానికి ప్రయత్నించడం, సమాజంలో విభజనను రెచ్చగొట్టడానికి చేసే ఏ ప్రయత్నాలపైనైనా తాము కఠిన చర్యలు తీసుకుంటామని మంత్రిత్వ శాఖ హెచ్చరించింది.