మనామా: మాదకద్రవ్యాలను దిగుమతి చేసుకుని, అక్రమ రవాణా చేసే ఉద్దేశ్యంతో వాటిని కలిగి ఉన్నందుకు ఒక ఆసియా వ్యక్తికి యావజ్జీవ కారాగార శిక్ష విధించినట్లు పబ్లిక్ ప్రాసిక్యూషన్ తెలిపింది. క్రిమినల్ హైకోర్టు నిందితుడికి 10,000 బహ్రెయిన్ దినార్ల జరిమానా కూడా విధించింది. శిక్షాకాలం పూర్తయిన తర్వాత అతడిని దేశం నుండి శాశ్వతంగా బహిష్కరించాలని ఆదేశించింది.

పబ్లిక్ ప్రాసిక్యూషన్‌లోని డ్రగ్ క్రైమ్స్ ప్రాసిక్యూషన్ డిప్యూటీ హెడ్ ప్రకారం.. విదేశాల నుండి నిందితుడి పేరు మీద వచ్చిన ఒక పోస్టల్ పార్శిల్ గురించి అంతర్గత వ్యవహారాల మంత్రిత్వ శాఖలోని మాదకద్రవ్యాల నిరోధక డైరెక్టరేట్‌కు సమాచారం అందింది. ఎక్స్-రే పరికరాలతో స్కాన్ చేయగా  ఆ పార్శిల్‌లో 2.5 కిలోగ్రాముల బరువున్న డ్రగ్ తో కూడిన సీసాలు ఉన్నట్లు గుర్తించారు. వెంటనే దర్యాప్తు ప్రారంభించి, అతనికి వ్యతిరేకంగా సేకరించిన సాక్ష్యాలను సేకరించింది. ఆ తర్వాత అతడిని కస్టడీలో క్రిమినల్ హైకోర్టుకు అప్పగించగా, ఆ కోర్టు అతడిని దోషిగా నిర్ధారిస్తూ తీర్పు ఇచ్చింది.