-పరేడ్ గ్రౌండ్స్‌లో లక్ష మందితో బహిరంగ సభ–2,600 మందికి పైగా పోలీసు సిబ్బంది మోహరింపు

హైదరాబాద్: భారత ప్రధాన మంత్రి నరేంద్ర మోదీ హైదరాబాద్ పర్యటన సందర్భంగా మే 10న సికింద్రాబాద్ పరేడ్ గ్రౌండ్స్‌లో నిర్వహించనున్న భారీ బహిరంగ సభకు పోలీసులు విస్తృత భద్రతా, ట్రాఫిక్ మరియు శాంతిభద్రతల ఏర్పాట్లు చేశారు. ఈ సభకు సుమారు లక్ష మంది హాజరవుతారని అంచనా వేస్తున్నారు.

సభ భద్రత కోసం సుమారు 2,000 మంది లా అండ్ ఆర్డర్ పోలీసులు, 620 మంది ట్రాఫిక్ పోలీసులు సహా ప్రత్యేక దళాలను మోహరించారు. మొత్తం బందోబస్తును 3 మంది డీసీపీలు, 5 మంది అదనపు డీసీపీలు, 21 మంది ఏసీపీలు పర్యవేక్షిస్తున్నారు. వీరికి తోడుగా 61 మంది ఇన్‌స్పెక్టర్లు, 226 మంది ఎస్సైలు, 1045 మంది ఏఎస్సైలు, హెడ్ కానిస్టేబుళ్లు, పోలీసు సిబ్బంది, హోం గార్డులు విధులు నిర్వర్తించనున్నారు.

ప్రత్యేక దళాల మోహరింపు

భద్రతా చర్యల్లో భాగంగా OCTOPUS కమాండోలు, SOT బృందాలు, ఇంటెలిజెన్స్ సిబ్బంది, ఐటీ & కమ్యూనికేషన్ విభాగాలు, కమాండ్ కంట్రోల్ సిబ్బంది, SHE Teams, బాంబ్ డిస్పోజల్ స్క్వాడ్, స్నిఫర్ డాగ్ స్క్వాడ్‌లను కీలక ప్రాంతాల్లో మోహరించారు.

పరేడ్ గ్రౌండ్స్, ప్రధాన రహదారులు, పార్కింగ్ ప్రదేశాలు, ముఖ్య కూడళ్లను సీసీ కెమెరాల ద్వారా నిరంతరం పర్యవేక్షిస్తున్నారు. అన్ని ప్రవేశ ద్వారాల వద్ద బహుళ స్థాయి భద్రతా తనిఖీలు, స్క్రీనింగ్ వ్యవస్థలు ఏర్పాటు చేశారని సీపీ సుమతి తెలిపారు.

నిషేధిత వస్తువుల పై కఠిన చర్యలు

సభ ప్రాంగణంలోకి ప్రవేశించే ప్రతి ఒక్కరికి తప్పనిసరిగా ఫ్రిస్కింగ్ నిర్వహిస్తారు. డ్రోన్లు, UAVలు, కెమెరాలు, ఎలక్ట్రానిక్ పరికరాలు, బ్యాగులు, బ్యానర్లు, వాటర్ బాటిళ్లు, పేలుడు పదార్థాలు, పదునైన వస్తువులు, బయట ఆహార పదార్థాలు తీసుకురావడం పూర్తిగా నిషేధించారు.

మే 10న ఉదయం 12 గంటల నుంచి రాత్రి 12 గంటల వరకు బేగంపేట్, బోయిన్‌పల్లి, మారేడ్‌పల్లి పోలీస్ స్టేషన్ పరిధిలో డ్రోన్లు మరియు ఇతర వైమానిక పరికరాల వినియోగాన్ని నిషేధిస్తూ పోలీసులు ఉత్తర్వులు జారీ చేశారు.

ట్రాఫిక్ ఆంక్షలు–ప్రత్యేక పార్కింగ్ ఏర్పాట్లు

పరేడ్ గ్రౌండ్స్, బేగంపేట్, ప్యారడైజ్, పాట్నీ తదితర ప్రాంతాల్లో ట్రాఫిక్ ఆంక్షలు అమలు చేయనున్నారు. సభా ప్రాంగణం సమీపంలో వాహనాలకు అనుమతి ఉండదని, కేవలం గుర్తించిన పార్కింగ్ ప్రాంతాల్లో మాత్రమే వాహనాలు నిలిపివేయాలని పోలీసులు సూచించారు.

మొత్తం 12 ప్రత్యేక పార్కింగ్ ప్రాంతాలను ఏర్పాటు చేసి, ప్రజల సౌకర్యార్థం QR కోడ్‌లను అందుబాటులో ఉంచారు. ముఖ్యంగా నల్గొండ, ఖమ్మం, వరంగల్, భువనగిరి జిల్లాల నుంచి వచ్చే బస్సులు ఉప్పల్ స్టేడియం పార్కింగ్ వద్ద నిలిపి, అక్కడి నుంచి మెట్రో రైళ్ల ద్వారా పరేడ్ గ్రౌండ్స్‌కు చేరుకోవాలని సూచించారు.

ప్రజలకు పోలీసుల సూచనలు

ప్రజలు తమ విలువైన వస్తువులను జాగ్రత్తగా చూసుకోవాలని, అనవసర సామగ్రి తీసుకురాకూడదని పోలీసులు సూచించారు. రద్దీ ప్రాంతాల్లో అప్రమత్తంగా ఉండాలని, అనుమానాస్పద వ్యక్తులు లేదా వస్తువులు కనిపిస్తే వెంటనే సమీప పోలీసు అధికారికి సమాచారం ఇవ్వాలని కోరారు.

సభ సందర్భంగా శాంతిభద్రతలకు భంగం కలిగించే చర్యలు, భద్రతా నిబంధనల ఉల్లంఘనలు చేస్తే చట్టపరమైన కఠిన చర్యలు తీసుకుంటామని హైదరాబాద్ పోలీసులు హెచ్చరించారు.