బెంగళూరులోని కగ్గళిపుర ప్రాంతంలో ఒక్కసారిగా ఉత్కంఠ నెలకొంది. ప్రధాని మోదీ ప్రయాణించే మార్గానికి అతి సమీపంలో పేలుడు పదార్థాలు ఉన్నట్లు అధికారులు గుర్తించారు. జిలిటెన్ స్టిక్స్ బయటపడటంతో భద్రతా సిబ్బంది వెంటనే అప్రమత్తమై ఆ ప్రాంతాన్ని తమ ఆధీనంలోకి తీసుకున్నారు. ఈ ఘటనతో స్థానికులు తీవ్ర భయాందోళనకు గురయ్యారు.

పేలుడు పదార్థాల ఉనికిని గుర్తించిన వెంటనే పోలీసులు రంగంలోకి దిగారు. ఈ వ్యవహారంలో సంబంధం ఉందని అనుమానిస్తున్న ఒక వ్యక్తిని పోలీసులు అదుపులోకి తీసుకున్నారు. ప్రధాని పర్యటనను టార్గెట్ చేస్తూ ఏవైనా కుట్రలు పన్నారా అనే కోణంలో అధికారులు లోతుగా దర్యాప్తు చేస్తున్నారు. నిందితుడిని రహస్య ప్రాంతంలో విచారిస్తున్నట్లు సమాచారం అందుతోంది.

ప్రధాని భద్రత విషయంలో ఎక్కడా రాజీ పడకుండా స్పెషల్ ప్రొటెక్షన్ గ్రూప్ (SPG) తనిఖీలు ముమ్మరం చేసింది. కగ్గళిపుర పరిసర ప్రాంతాల్లో అదనపు బలగాలను మోహరించారు. అనుమానిత వాహనాలను, వ్యక్తులను క్షుణ్ణంగా తనిఖీ చేసిన తర్వాతే అనుమతిస్తున్నారు. ఈ ఘటన నేపథ్యంలో కర్ణాటక పోలీసులు రాష్ట్రవ్యాప్తంగా నిఘా పెంచారు.