దోహా: ఖతార్ లో ఈద్ అల్-అధా వేడుకలు జోరుగా సాగుతున్నాయి. దోహా మరియు ఇతర ప్రాంతాలలోని ప్రముఖ టూరిస్టు డెస్టినేషన్స్ జనంతో కిటకిటలాడుతున్నాయి.  ఈ పవిత్ర పండుగ మొదటి రోజున వేలాది మంది మసీదులలో ప్రార్థనల కోసం గుమిగూడారు. అనంతరం జరిగిన ఉత్సవ సమావేశాలు ఖతార్ గొప్ప సాంస్కృతిక వారసత్వం, కుటుంబ బంధాలు మరియు ఆత్మీయ ఆతిథ్యాన్ని చాటిచెప్పాయి. కతారా తీరాల నుండి సౌక్ వకీఫ్ యొక్క సందడిగా ఉండే సందుల వరకు, దేశమంతా సాంప్రదాయ సంగీతం, కళ్లు చెదిరే ప్రదర్శనలు మరియు సామూహిక ఆనందంతో ఉప్పొంగింది.

కతారా కల్చరల్ విలేజ్‌లో వేడుకలు మధ్యాహ్నం ప్రారంభమై సాయంత్రం వరకు కొనసాగాయి. సాయంత్రం 4 గంటలకు ప్రారంభమైన ఖతారీ జానపద ప్రదర్శనలను సందర్శకులు ఆస్వాదించారు. కార్నిష్ వద్ద రెండు విడతలలో పిల్లలు ఈద్ బహుమతులు (ఈదియా) అందుకుని ఆనందంతో ఉబ్బిపోయారు.  కార్నిష్‌ లో అద్భుతమైన 10 నిమిషాల బాణసంచా ప్రదర్శన ఈ కార్యక్రమానికే ప్రధాన ఆకర్షణగా నిలిచింది. సముద్ర తీరం వెంబడి కూర్చున్న కుటుంబాలు కేరింతలు కొట్టాయి.  

ఓల్డ్ దోహా పోర్ట్ వద్ద జరుగుతున్న ఈద్ వేడుకల్లో 'చబ్రత్ అల్ మినా' వద్ద సంప్రదాయ సముద్ర సంబంధిత బ్యాండ్ ప్రదర్శనలు, ఆ ప్రాంతమంతటా ఏర్పాటు చేసిన ప్రత్యక్ష సంగీతకారుల ప్రదర్శనలు, ఉచిత అరబిక్ కాఫీ పంపిణీ మరియు వేడుకల సమయంలో అందించే ఈద్ బహుమతి పెట్టెలు హైలెట్ గా నిలిచాయి. ఒక ప్రత్యేకంగా అలంకరించిన సైకిల్ 'మినా డిస్ట్రిక్ట్' అంతటా తిరుగుతూ సందర్శకులకు పూలు మరియు అరబిక్ మిఠాయిలను పంపిణీ చేసింది.  

'చబ్రత్ అల్ మినా' వద్ద సముద్ర సంబంధిత బ్యాండ్ ప్రదర్శనలు పలు విడతలుగా జరిగాయి. ఖతార్‌కూ సముద్రానికీ ఉన్న చారిత్రక అనుబంధాన్ని ప్రతిబింబించే లయబద్ధమైన ప్రదర్శనల ద్వారా ఖతార్‌ సముద్రయాన వారసత్వాన్ని ఈ ప్రదర్శనలు చాటిచెప్పాయి.

ఓల్డ్ దోహా పోర్ట్ ఈద్ వేడుకలు మే 30వ తేదీ వరకు కొనసాగుతాయి. ఇవి సందర్శకులకు ఖతార్ సముద్ర వారసత్వం స్ఫూర్తితో కూడిన ఒక గాఢమైన సాంస్కృతిక అనుభవాన్ని అందిస్తూనే, అన్ని వయసుల వారికి ఆసక్తికరమైన కార్యకలాపాలను కల్పిస్తాయి.

 సంప్రదాయ దోహాకు గుండెకాయ వంటి 'సూక్ వకీఫ్' (Souq Waqif) ప్రాంతం తెల్లవారుజాము నుంచే సందడిగా మారింది. తాజా నాన్ వెజ్ వంటకాలు మరియు అరబిక్ కాఫీ సువాసనలను ఆస్వాదిస్తూనే, స్వీట్లు, సంప్రదాయ వస్త్రాలు మరియు బహుమతులను కొనుగోలు చేయడానికి వచ్చిన సందర్శకులతో ఇరుకైన వీధులన్నీ కిక్కిరిసిపోయాయి.

'అల్ బిద్దా పార్క్' (Al Bidda Park) ఒక ఆహ్లాదకరమైన బహిరంగ విహార ప్రదేశంగా సందర్శకులను ఆకట్టుకుంది.  పచ్చని మైదానాలు పిక్నిక్ చేసుకునే కుటుంబాలతో, పిల్లల ఆట స్థలాలతో మరియు సాధారణ కుటుంబ సమావేశాలతో కళకళలాడాయి. పార్కులోని సముద్రతీరం జనం కిక్కిరిసిపోయారు.  అల్ వక్రా మరియు ది పెర్ల్ వంటి ఇతర ప్రాంతాలలో కూడా ఇలాంటి దృశ్యాలే ఆవిష్కృతమయ్యాయి.