ఆర్టిఫిషియల్ ఇంటెలిజెన్స్ (AI) సాంకేతికత వైపు వేగంగా అడుగులు వేస్తున్న మెటా కంపెనీ, అందుకోసం తన సంస్థను సిద్ధం చేసే పనిలో పడింది. ఇందులో భాగంగా మే నెలలో ఏకంగా 8,000 మంది ఉద్యోగులను, అంటే మొత్తం సిబ్బందిలో దాదాపు 10 శాతం మందిని తొలగిస్తున్నట్లు ఏప్రిల్‌లోనే ప్రకటించింది. మిగిలిన వేలాది మంది ఉద్యోగులను కూడా ఏఐ ప్రాజెక్టుల వైపు మళ్లించేందుకు ప్రణాళికలు సిద్ధం చేసింది. ఈ ఆకస్మిక మార్పులు ఉద్యోగుల్లో తీవ్ర ఆందోళనకు దారితీశాయి. బే ఏరియాలో డేటా సైన్స్ నిపుణురాలిగా పనిచేస్తున్న మీరా (పేరు మార్చబడింది) ఇటీవలే తల్లి అయింది. మెటా ప్రకటించిన లేఆఫ్స్ వార్త ఆమెకు నిద్రలేని రాత్రులను మిగిల్చింది. పుట్టిన బిడ్డకు పాలు పట్టే సమయాల్లో, విశ్రాంతి తీసుకునే ప్రతి క్షణంలోనూ ‘ఉద్యోగం ఉంటుందా లేదా’ అనే భయమే ఆమెను వెంటాడింది. ఒక కొత్త తల్లిగా బిడ్డ ఎదుగుదలపై, తన ఆరోగ్యంపై శ్రద్ధ పెట్టాల్సిన సమయంలో, లేఆఫ్స్ భయం ఆమెను తీవ్రమైన మానసిక ఆందోళనకు గురిచేసింది.

ప్రపంచవ్యాప్తంగా తెల్లవారుజామున అందిన ఈ-మెయిల్ దుర్వార్తలు

మే 20న మెటా కంపెనీ ఉద్యోగాల తొలగింపు ప్రక్రియను అమలు చేసింది. వివిధ టైమ్ జోన్‌ల ఆధారంగా ప్రపంచవ్యాప్తంగా ఉన్న ఉద్యోగులకు తెల్లవారుజామునే ఈ-మెయిళ్ల ద్వారా ఈ చేదు వార్త చేరింది. మొదట సింగపూర్‌లోని ఉద్యోగులకు ఉదయం 4 గంటలకు మెయిల్స్ రాగా, ఆ తర్వాత పశ్చిమ దిశగా బ్రిటన్, అమెరికా దేశాల్లోని ఉద్యోగుల ఇన్‌బాక్స్‌లకు ఈ సమాచారం చేరింది. ఆ ఉదయం వేలాది మంది జీవితాలను అంధకారంలోకి నెట్టేసింది.

హెచ్-1బి (H-1B) వీసాదారుల పీడకల..

మీరా సేఫ్ అమెరికాలో ఉద్యోగాలు కోల్పోయిన విదేశీయులకు, ముఖ్యంగా హెచ్-1బి వీసా ఉన్నవారికి 60 రోజుల గడువు మాత్రమే ఉంటుంది. ఈ లోగా కొత్త ఉద్యోగం దొరకకపోతే స్వదేశానికి తిరిగి వెళ్లాల్సిందే. మీరాకు ఉద్యోగం పోయి ఉంటే బిడ్డతో సహా భారతదేశానికి తిరిగి రావాల్సిన పరిస్థితి ఏర్పడేది. అదృష్టవశాత్తూ ఆమెకు ఉద్యోగ తొలగింపు మెయిల్ రాలేదు. దీంతో ఆమె ఉద్యోగం సురక్షితంగా నిలిచింది మరియు 60 రోజుల వీసా గడువు పీడకల నుండి ఆమె తప్పించుకోగలిగింది. ఉద్యోగం నిలబడినప్పటికీ, మీరా దానికి పెద్ద మూల్యమే చెల్లించాల్సి వచ్చింది. ఆమె కింద పనిచేసే తొమ్మిది మంది సభ్యుల బృందం మొత్తం లేఆఫ్స్‌లో ఉద్యోగాలు కోల్పోయింది. దాంతో పాటు ఆమె మేనేజర్ పదవి కూడా పోయింది. మేనేజర్ల సంఖ్యను తగ్గించి, పెద్ద బృందాలను సరళంగా నిర్వహించాలనే మెటా నూతన విధానం (Flatter Structure) వల్ల ఆమెను కేవలం ఒక ఇండివిడ్యువల్ కంట్రిబ్యూటర్ (Individual Contributor) స్థానానికి పరిమితం చేశారు.