కువైట్: కువైట్ గగనతలంలోకి చొరబడటం మరియు కువైట్ అంతర్జాతీయ విమానాశ్రయంలోని సౌకర్యాలను లక్ష్యంగా చేసుకుని దాడులు చేయడం ద్వారా ఇరాన్ పదేపదే కువైట్ సార్వభౌమాధికారాన్ని ఉల్లంఘిస్తోందని కువైట్ డైరెక్టరేట్ జనరల్ ఆఫ్ సివిల్ ఏవియేషన్ (డీజీసీఏ) అంతర్జాతీయ పౌర విమానయాన సంస్థ (ఐసీఏఓ)కు రెండవ అధికారిక నిరసనను సమర్పించింది. ఈ సంఘటనలు అంతర్జాతీయ పౌర విమానయాన ఒప్పందాలు మరియు కన్వెన్షన్ల తీవ్రమైన ఉల్లంఘనలని ఐసీఏఓకు పంపిన తాజా నిరసన నోట్ లో డీజీసీఏ పేర్కొంది. ఇటువంటి చర్యలు కువైట్ అంతర్జాతీయ విమానాశ్రయంలో ప్రయాణీకుల భద్రతకు, విమానయాన సంస్థల కార్యకలాపాలకు, విమానాశ్రయ సిబ్బందికి మరియు కీలకమైన మౌలిక సదుపాయాలకు ప్రత్యక్ష ముప్పును కలిగిస్తాయని హెచ్చరించింది.

గత బుధవారం టెర్మినల్ 1 (T1)ను లక్ష్యంగా చేసుకుని జరిగిన దాడిని DGCA ప్రముఖంగా ప్రస్తావించింది. ఈ దాడిలో ప్రాణనష్టంతోపాటు భారీగా ఆస్తి నష్టం కలిగాయని తెలిపింది. ఈ ఘటన విమానయాన కార్యకలాపాలకు కూడా అంతరాయం కలిగించిందన్నారు. దీనివల్ల విమానాశ్రయానికి రాకపోకలు సాగించే విమానాలను తాత్కాలికంగా నిలిపివేయవలసి వచ్చిందని, అలాగే ప్రయాణీకుల రాకపోకలు మరియు విమానయాన సంస్థల కార్యకలాపాలపై తీవ్ర ప్రభావం పడిందని డీజీసీఏ తెలిపింది.

ఫిబ్రవరి 28న జరిగిన దాడి తర్వాత చేపట్టిన మరమ్మత్తు మరియు పునరుద్ధరణ పనుల అనంతరం, టెర్మినల్ 1 కార్యకలాపాలను తిరిగి ప్రారంభించిన కేవలం 48 గంటలకే ఈ దాడి జరగడం, దాని తీవ్రతను మరింత పెంచిందని ఆ సంస్థ తెలిపింది. ఇలాంటి ఉల్లంఘనలు పదేపదే జరగడం సాధారణ విమాన రాకపోకలను పునరుద్ధరించే ప్రయత్నాలను దెబ్బతీస్తాయని, కువైట్ పౌర విమానయాన రంగం భద్రత, స్థిరత్వానికి ప్రమాదం కలిగిస్తాయని కువైట్ స్పష్టం చేసింది. పౌర విమానయానాన్ని పరిరక్షించడానికి తక్షణం అంతర్జాతీయ చర్యలు తీసుకోవాలని కువైట్ పిలుపునిచ్చింది. తమ సార్వభౌమత్వాన్ని, గగనతలాన్ని, పౌర విమానయాన మౌలిక సదుపాయాలను పరిరక్షించుకోవడానికి అవసరమైన చర్యలు తీసుకునేందుకు, అంతర్జాతీయ చట్టం ప్రకారం కువైట్‌కు అన్ని చట్టపరమైన హక్కులు ఉన్నాయని డీజీసీఏ పునరుద్ఘాటించింది.