ముంబై: అదానీ ఎనర్జీ సొల్యూషన్స్ లిమిటెడ్ (AESL) దేశంలోని ప్రముఖ స్మార్ట్ మీటరింగ్ సంస్థ ఇంటెల్లి స్మార్ట్ ఇన్‌ఫ్రా ప్రైవేట్ లిమిటెడ్‌లో 100 శాతం ఈక్విటీ వాటాను కొనుగోలు చేసేందుకు రూ.3,050 కోట్ల విలువైన ఒప్పందం కుదుర్చుకుంది.

ఈ కొనుగోలు పూర్తయిన తర్వాత అదానీ ఎనర్జీ స్మార్ట్ మీటరింగ్ రంగంలో తన ఆధిపత్యాన్ని మరింత బలోపేతం చేసుకోనుంది. కంపెనీ మొత్తం స్మార్ట్ మీటర్ల పోర్ట్‌ఫోలియో 4.70 కోట్లకు పైగా పెరగనుండటంతో, భారతదేశంలోనే అతిపెద్ద స్మార్ట్ మీటరింగ్ ప్లాట్‌ఫారమ్‌గా అవతరించనుంది.

ప్రస్తుతం ఇంటెల్లి స్మార్ట్ సంస్థకు ఉత్తరప్రదేశ్, గుజరాత్, మధ్యప్రదేశ్, బిహార్, అస్సాం రాష్ట్రాల్లో 2.20 కోట్లకు పైగా స్మార్ట్ మీటర్ల పోర్ట్‌ఫోలియో ఉంది. ఈ ప్రాజెక్టులు విద్యుత్ పంపిణీ సంస్థల సామర్థ్యాన్ని పెంచడంతో పాటు వినియోగదారులకు మెరుగైన సేవలు అందించడంలో కీలక పాత్ర పోషిస్తున్నాయి.

ఈ వ్యూహాత్మక కొనుగోలు ద్వారా దేశంలో స్మార్ట్ మీటరింగ్ మౌలిక సదుపాయాల విస్తరణకు మరింత ఊతం లభిస్తుందని పరిశ్రమ వర్గాలు భావిస్తున్నాయి. విద్యుత్ రంగంలో డిజిటలైజేషన్, శక్తి సామర్థ్యాన్ని పెంపొందించే దిశగా ఈ ఒప్పందం కీలక అడుగుగా నిలవనుందని పేర్కొంటున్నారు.

అదానీ ఎనర్జీ ఇప్పటికే దేశవ్యాప్తంగా విద్యుత్ ప్రసారం, పంపిణీ, స్మార్ట్ మీటరింగ్ రంగాల్లో కార్యకలాపాలు నిర్వహిస్తుండగా, ఇంటెల్లి స్మార్ట్ కొనుగోలుతో తన వ్యాపార విస్తరణకు మరింత బలం చేకూరనుంది.