కువైట్ సిటీ: లులు గ్రూప్ చైర్మన్, మేనేజింగ్ డైరెక్టర్ ఎం.ఏ.యూసఫ్ అలీ కువైట్ అమీర్ షేక్ మెషాల్ అల్-అహ్మద్ అల్-జాబెర్ అల్-సబాహ్ను బయాన్ ప్యాలెస్‌లో మర్యాదపూర్వకంగా కలిశారు. జూన్ 30న జరిగిన ఈ సమావేశంలో లులు గ్రూప్ ప్రతినిధి బృందం కూడా పాల్గొంది.

ఈ సందర్భంగా సంక్షోభ సమయాల్లో కువైట్‌లో ఆహార భద్రతను బలోపేతం చేయడానికి లులు గ్రూప్ చేపట్టిన వివిధ కార్యక్రమాలను అమీర్‌కు యూసఫ్ అలీ వివరించారు. దేశంలో అవసరమైన ఆహార సరఫరా నిరంతరాయంగా కొనసాగేందుకు సంస్థ తీసుకున్న చర్యలను వివరించినట్లు తెలిపారు.

లులు గ్రూప్ కువైట్ ఆహార భద్రతకు అందిస్తున్న సేవలు, నిబద్ధతను అమీర్ షేక్ మెషాల్ అల్-అహ్మద్ అల్-జాబెర్ అల్-సబాహ్ అభినందించినట్లు వెల్లడించారు. దేశ ప్రజలకు అవసరమైన ఆహార సరఫరా వ్యవస్థను బలోపేతం చేయడంలో లులు గ్రూప్ చేసిన కృషిని ఆయన ప్రశంసించారు.

ఈ సమావేశానికి అవకాశం కల్పించిన కువైట్ అమీర్‌కు యూసఫ్ అలీ కృతజ్ఞతలు తెలిపారు. కువైట్ అభివృద్ధి, ఆహార భద్రత రంగాల్లో ప్రభుత్వంతో కలిసి మరింత సమర్థవంతంగా పనిచేస్తామని ఆయన పేర్కొన్నారు.