కువైట్: కువైట్ చరిత్రలోనే అతిపెద్ద శాసన సంస్కరణ మరియు ఆధునీకరణ ప్రణాళికను కువైట్ ప్రభుత్వం ప్రకటించిన ఏడాది లోపే మెరుగైన ఫలితాలను సాధిస్తోంది. కొత్త సంస్కరణలు ముసాయిదా దశ నుండి వాస్తవ సంస్కరణ సాధనాలుగా మారి, అభివృద్ధి మరియు సామాజిక భద్రతా సూచికలలో మెరుగై మార్పులను తీసుకొచ్చాయి. గత ఏడాది ఆగస్టు నుండి కొత్త చట్టాలను ప్రవేశపెట్టారు. ప్రస్తుత శాసనాలకు కీలక సవరణలతో  దాదాపు 140 డిక్రీలను ప్రచురించింది. ప్రజా భద్రత, సమాజ రక్షణ, ప్రాణాలకు మరియు ఆస్తులకు రక్షణ,  సమగ్ర అభివృద్ధిని సాధించడంలో ప్రభుత్వ సామర్థ్యాన్ని బలోపేతం చేయడం వంటి అనేక కీలక సూచికలలో గణనీయమైన మార్పులను తీసుకువచ్చిన ఈ శాసన సంస్కరణల ప్రభావాన్ని అధికారిక గణాంకాలు తెలియజేస్తున్నాయి.

మార్చి మధ్యలో అమల్లోకి వచ్చిన 'గృహ హింస నుండి కుటుంబ రక్షణ చట్టం' అత్యంత ముఖ్యమైన సంస్కరణలలో ఒకటి. కువైట్ కట్టుబాట్లకు అనుగుణంగా కుటుంబ స్థిరత్వాన్ని పెంపొందించే దిశగా ఈ చట్టం ఒక వ్యూహాత్మక ముందడుగుగా భావిస్తున్నారు. ఈ చట్టం ప్రభావం ఇప్పటికే న్యాయ వ్యవస్థలో ప్రతిఫలించింది. అమలులోకి వచ్చిన మొదటి మూడు నెలల్లో పబ్లిక్ ప్రాసిక్యూషన్‌లో నమోదైన గృహ హింస కేసులు 33 శాతం తగ్గాయని గణాంకాలు చెబుతున్నాయి. ఈ చట్టం బలమైన కుటుంబ రక్షణను అందించడంతో పాటు న్యాయపరమైన ప్రక్రియల దుర్వినియోగాన్ని అడ్డుకుంటుంది.  
మాదకద్రవ్యాలకు సంబంధించిన నేరాల నుండి సమాజాన్ని రక్షించే ప్రయత్నాలను శాసన సంస్కరణలు బలోపేతం చేశాయి. డిసెంబర్ మధ్యలో అమల్లోకి వచ్చిన, మాదకద్రవ్యాలు మరియు సైకోట్రోపిక్ పదార్థాల నిర్మూలన చట్టం.. మాదకద్రవ్యాల అక్రమ రవాణా కేసులలో తగ్గుదలకు కారణమైంది.  కొత్త మాదకద్రవ్యాల చట్టం కువైట్‌లోకి మాదకద్రవ్యాల స్మగ్లింగ్‌ను 80 శాతం తగ్గించిందని మొదటి ఉప ప్రధాన మంత్రి మరియు అంతర్గత వ్యవహారాల మంత్రి షేక్ ఫహద్ యూసెఫ్ సౌద్ అల్-సబాహ్ స్పష్ట చేశారు.  దేశంలోకి ప్రవేశించడానికి ప్రయత్నిస్తున్న సుమారు 95 శాతం మాదకద్రవ్యాల రవాణాను భద్రతా అధికారులు విజయవంతంగా అడ్డుకున్నారని కూడా ఆయన అన్నారు. తాజా అధికారిక గణాంకాల ప్రకారం, 2025లోని ఇదే కాలంతో పోలిస్తే ఈ సంవత్సరం మొదటి అర్ధభాగంలో మాదకద్రవ్యాల దిగుమతి కేసులు సుమారు 86 శాతం తగ్గాయి. మాదకద్రవ్యాల అక్రమ రవాణా కేసులు దాదాపు 49 శాతం తగ్గి, 354 కేసుల నుండి 184కి చేరాయి.

ఇదిలా ఉండగా, 2025 నాటి ట్రాఫిక్ చట్టం అమలుతో ప్రజలు కూడా పెద్ద మార్పులను చూశారు. ఇది వాహన డ్రైవింగ్ ప్రవర్తనను మరియు ట్రాఫిక్ నిబంధనల పాటించడాన్ని గణనీయంగా మెరుగుపరిచింది. అంతర్గత వ్యవహారాల మంత్రిత్వ శాఖ గణాంకాల ప్రకారం.. సిగ్నల్ జంప్ ఉల్లంఘనలు 63 శాతం తగ్గి, 140,539 నుండి 51,732కు పడిపోయాయి. అలాగే, అతివేగం ఉల్లంఘనలు 65 శాతం తగ్గి, 1,618,739 నుండి 561,820కి చేరాయి. చట్టం అమలులోకి వచ్చిన మొదటి నెలలోనే, ఆటోమేటెడ్ ట్రాఫిక్ కెమెరాల ద్వారా గుర్తించిన ఉల్లంఘనలు - అతివేగం మరియు రెడ్-లైట్ దాటే నేరాలతో సహా - 83 శాతం తగ్గాయి. వాహనం నడుపుతున్నప్పుడు సీట్ బెల్టులు పెట్టుకోకపోవడం మరియు మొబైల్ ఫోన్లు వాడటం వంటి ఉల్లంఘనలలో 75 శాతం తగ్గుదల నమోదైనట్లు మంత్రిత్వ శాఖ నివేదించింది. అన్నింటికన్నా ముఖ్యంగా, రోడ్డు ప్రమాద మరణాలు 55 శాతం తగ్గాయి. మే 2024లో 22 మరణాలు నమోదు కాగా, మే 2025లో ఈ సంఖ్య 10కి పడిపోయింది.
మరోవైపు, ఆగస్టు 2025లో అధికారికంగా అమల్లోకి వచ్చిన రియల్ ఎస్టేట్ డెవలపర్ చట్టం కింద మూడు పెట్టుబడి అవకాశాల కోసం రియల్ ఎస్టేట్ డెవలపర్‌లను ముందస్తుగా అర్హులుగా ప్రకటించే ప్రణాళికలను ప్రభుత్వం ఇటీవల ప్రకటించింది. ఈ ప్రాజెక్టులలో అల్-ముత్లా, సాద్ అల్-అబ్దుల్లా మరియు జా నగరాలలో సుమారు 5,000 గృహ యూనిట్లు ఉన్నాయి.

బెర్ అల్-అహ్మద్ ఉన్నాయి. సివిల్ మరియు వాణిజ్య కార్యవిధాన చట్టం మరియు క్రిమినల్ కార్యవిధాన చట్టానికి చేసిన శాసన సవరణలు కూడా కోర్టు కేసుల భారాన్ని గణనీయంగా తగ్గించాయి. 2025 ద్వితీయార్థంలో, పెండింగ్‌లో ఉన్న మొత్తం కోర్టు కేసులు దాదాపు 21 శాతం తగ్గి, సుమారు 534,000 నుండి 423,000కు చేరాయి. కోర్ట్ ఆఫ్ కాసేషన్ ముందున్న కేసులు 45 శాతం తగ్గి, సుమారు 12,000 నుండి 7,000కు చేరాయి.కోర్ట్ ఆఫ్ ఫస్ట్ ఇన్‌స్టెన్స్ ముందున్న క్రిమినల్ కేసులు 27 శాతం తగ్గి, దాదాపు 286,000 నుండి 208,000కు పడిపోయాయి. సివిల్ మరియు వాణిజ్య అప్పీల్ కేసులు దాదాపు 27 శాతం తగ్గి, సుమారు 6,000 నుండి 4,000కు పడిపోయాయి.  

అంతర్జాతీయంగా 2025 అవినీతి అవగాహన సూచికలో కువైట్ తన స్థానాన్ని నిలబెట్టుకుంది. విస్తృతమైన శాసనపరమైన మరియు సంస్థాగత సంస్కరణల వల్లే ఇది సాధ్యమైందని అధికారులు పేర్కొంటున్నారు. అవినీతి నిరోధక ప్రజా ప్రాధికార సంస్థ (నజాహా)  వ్యవస్థాపక చట్టాన్ని సవరిస్తూ, 2025 నాటి చట్టాన్ని జాతీయ అసెంబ్లీ ఆమోదించింది. ఈ సవరణల ఉద్దేశ్యం పారదర్శకతను బలోపేతం చేయడం, అదనపు చట్టపరమైన రక్షణలను అందించడం, అన్ని అవినీతి ఆరోపణలు న్యాయ పర్యవేక్షణకు లోబడి ఉండేలా చూడటం మరియు శిక్ష నుండి తప్పించుకునే అవకాశాలను తగ్గించింది. 2026 డిసెంబర్ నాటికి కువైట్ శాసనాలలో సుమారు 25 శాతం - అంటే దాదాపు 250 చట్టాలను ఆధునీకరించడాన్ని లక్ష్యంగా నిర్దేశించుకున్నట్టు న్యాయశాఖ మంత్రి వెల్లడించారు.