విశాఖపట్నం: ఆంధ్రప్రదేశ్‌లో సమాచార సాంకేతిక (IT) రంగానికి భారీ ఊపునిచ్చే కీలక పరిణామం నమోదైంది. ప్రముఖ అంతర్జాతీయ టెక్ దిగ్గజం ‘కాగ్నిజెంట్ టెక్నాలజీ సొల్యూషన్స్’ విశాఖపట్నంలో సరికొత్త ఐటీ/ఐటీఈఎస్ ప్రత్యేక ఆర్థిక మండలి (SEZ) ఏర్పాటుకు కేంద్ర ప్రభుత్వం నుంచి తుది అనుమతులు సాధించింది. ఈ మేరకు కేంద్ర వాణిజ్య, పరిశ్రమల మంత్రిత్వ శాఖ అధికారిక నోటిఫికేషన్‌ను కూడా విడుదల చేసింది.

మధురవాడలో 8.98 హెక్టార్ల విస్తీర్ణం.. ఇన్‌ల్యాండ్ కంటైనర్ డిపోగా గుర్తింపు
విశాఖపట్నం రూరల్ మండలం పరిధిలోని ఐటీ-మధురవాడ-2 ప్రాంతంలో దాదాపు 8.98 హెక్టార్ల సువిశాల విస్తీర్ణంలో ఈ అత్యాధునిక సెజ్‌ను నిర్మించనున్నారు. ఈ ప్రాజెక్ట్‌కు సంబంధించి కాగ్నిజెంట్ సంస్థకు ఇప్పటికే లెటర్ ఆఫ్ అప్రూవల్ (LoA) అందింది. సెజ్ నిబంధనల ప్రకారం డెవలప్‌మెంట్ కమిషనర్ ఆధ్వర్యంలో ఒక ప్రత్యేక అప్రూవల్ కమిటీని సైతం రంగంలోకి దించారు. కస్టమ్స్ క్లియరెన్స్ మరియు ఇతర కార్యకలాపాలను వేగవంతం చేసేందుకు వీలుగా ఈ సెజ్‌ను ‘ఇన్‌ల్యాండ్ కంటైనర్ డిపో’గా కేంద్రం ప్రకటించడం విశేషం.

తెలంగాణ నుంచి వైదొలిగి.. ఏపీలో అడుగు
కొన్ని నెలల క్రితం తెలంగాణలోని ఐటీ హబ్‌లైన నానక్‌రామ్‌గూడ, ఆదిభట్ల ప్రాంతాలలో తాము ప్రతిపాదించిన రెండు ఐటీ సెజ్ ప్రాజెక్టులను కాగ్నిజెంట్ వెనక్కి తీసుకున్న సంగతి తెలిసిందే. అక్కడ వెనక్కి తగ్గిన వెంటనే, ఏపీలోని విశాఖపట్నంలో ఇంతటి భారీ ప్రాజెక్ట్‌కు కేంద్రం నుంచి అనుమతులు తెచ్చుకోవడం ఐటీ వర్గాల్లో హాట్ టాపిక్‌గా మారింది.

రూ.1,580 కోట్ల పెట్టుబడి..8,000 మందికి ఉపాధి
ఈ మెగా ఐటీ ప్రాజెక్ట్ ద్వారా విశాఖపట్నంలో దాదాపు రూ.1,580 కోట్ల పెట్టుబడులు రాబోతున్నట్లు అంచనా. దీని ద్వారా సుమారు 8,000 మంది ఐటీ నిపుణులకు ప్రత్యక్షంగా ఉద్యోగ అవకాశాలు లభించనున్నాయి. దశలవారీగా ఈ క్యాంపస్‌ను అంతర్జాతీయ ప్రమాణాలతో అభివృద్ధి చేయనుండగా, రాబోయే రోజుల్లో విశాఖ ఐటీ రంగానికి ఇది గేమ్ ఛేంజర్‌గా మారుతుందని పరిశ్రమ నిపుణులు ఆశాభావం వ్యక్తం చేస్తున్నారు.