మస్కట్: ప్రపంచంలో అత్యంత సురక్షిత దేశాల జాబితాలో ఒమన్ రెండో స్థానాన్ని దక్కించుకుంది. 2026 యూఎస్ న్యూస్ బెస్ట్ కంట్రీస్ – పబ్లిక్ సేఫ్టీ ర్యాంకింగ్స్ లో ఈ ఘనత సాధించింది. తద్వారా పౌరులు, ప్రవాసులు, పర్యాటకులకు అత్యంత భద్రమైన దేశంగా మరోసారి తన స్థానాన్ని నిలబెట్టుకుంది. ఈ ర్యాంకింగ్స్‌లో సింగపూర్ తొలి స్థానంలో నిలవగా, ఒమన్ రెండో స్థానం, జపాన్ మూడో స్థానం దక్కించుకున్నాయి. అనంతరం ఖతార్, వియత్నాం, హంగేరీ, దక్షిణ కొరియా, న్యూజిలాండ్, లక్సెంబర్గ్ దేశాలు వరుసగా స్థానాలు సంపాదించాయి.

ప్రపంచవ్యాప్తంగా ప్రజల్లో ఉన్న భద్రతపై అభిప్రాయాలను ఆధారంగా చేసుకుని ఈ ర్యాంకింగ్స్‌ను రూపొందించారు. ఇది యూఎస్ న్యూస్ బెస్ట్ కంట్రీస్ నివేదికలో భాగంగా విడుదలైంది. తక్కువ నేరాల రేటు, రాజకీయ స్థిరత్వం, ప్రశాంత వాతావరణం, ఆతిథ్య భావన కారణంగా ఒమాన్‌కు అంతర్జాతీయ స్థాయిలో ఇప్పటికే మంచి గుర్తింపు ఉంది. నివసించడానికి, ఉద్యోగాలు చేయడానికి, పెట్టుబడులు పెట్టడానికి, పర్యటించడానికి అనువైన సురక్షిత దేశంగా ఒమాన్‌ను ప్రపంచవ్యాప్తంగా గుర్తిస్తున్నారు. తాజా ర్యాంకింగ్‌తో మధ్యప్రాచ్యంతో పాటు ప్రపంచంలోని అత్యంత సురక్షిత దేశాల్లో ఒకటిగా ఒమన్ తన ప్రతిష్ఠను మరింత బలోపేతం చేసుకుంది.