మనామా: ఇరాన్ జరిపిన దాడుల సందర్భంగా శత్రు డ్రోన్లు బహ్రెయిన్ ఫ్లైట్ ఇన్ఫర్మేషన్ రీజియన్ (FIR)కు సేవలందించే పౌర వైమానిక నావిగేషన్ పరికరాలను లక్ష్యంగా చేసుకున్నప్పటికీ, విమానాల రాకపోకలకు ఎలాంటి అంతరాయం కలగలేదని బహ్రెయిన్ సివిల్ ఏవియేషన్ అఫైర్స్ (CAA) వెల్లడించింది.

బహ్రెయిన్ న్యూస్ ఏజెన్సీ (BNA) ప్రచురించిన ప్రకటనలో, దాడి జరిగిన వెంటనే సంబంధిత అధికారులు ఆమోదిత భద్రతా, కార్యాచరణ విధానాల ప్రకారం అత్యవసర చర్యలు చేపట్టారని తెలిపింది. వైమానిక నావిగేషన్ సేవలు నిరంతరాయంగా కొనసాగేందుకు అవసరమైన అన్ని ఏర్పాట్లు చేసినట్లు పేర్కొంది.

బహ్రెయిన్ గగనతల భద్రతకు ఎలాంటి విఘాతం కలగకుండా అధికారులు పరిస్థితిని సమర్థంగా నిర్వహించారని, విమానాల రాకపోకలు సురక్షితంగా కొనసాగుతున్నాయని సీఏఏ స్పష్టం చేసింది.

బహ్రెయిన్ ఫ్లైట్ ఇన్ఫర్మేషన్ రీజియన్ గుండా ప్రయాణించే అంతర్జాతీయ విమానాలతో పాటు అన్ని విమాన సర్వీసులు సాధారణంగానే కొనసాగుతున్నాయని తెలిపింది. అంతర్జాతీయ సంస్థలు, సంబంధిత అధికార యంత్రాంగంతో సమన్వయం కొనసాగిస్తూ పరిస్థితిని నిరంతరం పర్యవేక్షిస్తున్నట్లు బహ్రెయిన్ సివిల్ ఏవియేషన్ అఫైర్స్ వెల్లడించింది.