వాషింగ్టన్/టెహ్రాన్: మిడిల్ ఈస్ట్ లో ఉద్రిక్త పరిస్థితులు మరింత తీవ్రరూపం దాల్చుతున్నాయి. ఇరాన్‌పై అమెరికా సైన్యం వరుసగా పదో రాత్రి కూడా వైమానిక దాడులు నిర్వహించినట్లు ప్రకటించింది. హోర్ముజ్ జలసంధి గుండా అంతర్జాతీయ నౌకాయానానికి ముప్పుగా ఉన్న లక్ష్యాలను గురి చేసుకుని ఈ దాడులు చేపట్టినట్లు అమెరికా సైన్యం వెల్లడించింది.

మరోవైపు, ఇరాన్ ఇస్లామిక్ రివల్యూషనరీ గార్డ్ కార్ప్స్ (IRGC) బహ్రెయిన్, కువైట్‌లో ఉన్న అమెరికా సైనిక లక్ష్యాలపై, ముఖ్యంగా గగనతల రక్షణ వ్యవస్థలపై దాడులు నిర్వహించినట్లు ప్రకటించింది. అలాగే హోర్ముజ్ జలసంధిలో నిబంధనలు పాటించని రెండు చమురు ట్యాంకర్లను అడ్డుకున్నామని ఐఆర్‌జీసీ తెలిపింది.

ఇదిలా ఉండగా, బ్రిటన్‌కు చెందిన యూకే మారిటైమ్ ట్రేడ్ ఆపరేషన్స్ (UKMTO) ఒమాన్ తీరానికి సమీపంలో ప్రయాణిస్తున్న ఒక చమురు ట్యాంకర్‌పై గుర్తుతెలియని ప్రక్షేపకం (ప్రాజెక్టైల్) తాకినట్లు వెల్లడించింది. ఈ ఘటనకు సంబంధించిన పూర్తి వివరాలు ఇంకా వెల్లడికాలేదు.

హోర్ముజ్ జలసంధి ప్రాంతంలో ఉద్రిక్తతలు కొనసాగుతున్న నేపథ్యంలో ప్రపంచ ఇంధన సరఫరా, అంతర్జాతీయ నౌకాయానంపై ఆందోళనలు పెరుగుతున్నాయి. పరిస్థితిని అంతర్జాతీయ సమాజం నిశితంగా గమనిస్తోంది.