హైదరాబాద్: హీరో తిరువీర్, హీరోయిన్ ఫరియా అబ్దుల్లా జంటగా నటిస్తున్న ‘భగవంతుడు’ చిత్రంలోని రెండో సింగిల్ ‘సిత్తరాల నవ్వు’ ప్రేక్షకుల ముందుకు వచ్చింది. ప్రేమ, పల్లె అందాలను ప్రతిబింబించే ఈ మెలోడీ పాటను చిత్రబృందం అధికారికంగా విడుదల చేసింది.

“ఆమె ఏరువాక పున్నమి... అతను కొండగాలి దేవర... ఆ ప్రేమ ఓ మట్టి పాట” అనే భావోద్వేగ ట్యాగ్‌లైన్‌తో విడుదలైన ఈ పాట సంగీత ప్రియులను ఆకట్టుకుంటోంది. గ్రామీణ నేపథ్యంలోని ప్రేమకథను ప్రతిబింబించేలా సాహిత్యం, సంగీతం అలరించేలా ఉన్నాయని అభిమానులు అభిప్రాయపడుతున్నారు.

ఈ పాటకు కేపీ (KP) సంగీతం అందించగా, గోపి విహారి సాహిత్యం రచించారు. ప్రముఖ గాయకుడు జావేద్ అలీ తన మధుర గాత్రంతో పాటకు ప్రాణం పోశారు.

ఈ చిత్రంలో తిరువీర్, ఫరియా అబ్దుల్లాతో పాటు రవీంద్ర విజయ్ తదితరులు కీలక పాత్రలు పోషిస్తున్నారు.చిత్రానికి రవి పనస నిర్మాతగా వ్యవహరిస్తుండగా, క్రాంతి దర్శకత్వం వహిస్తున్నారు.సినిమాటోగ్రఫీని రాజ్ తోట, ఎడిటింగ్‌ను ప్రవీణ్ పూడి నిర్వహించారు.

ఇప్పటికే విడుదలైన ప్రచార చిత్రాలు, తాజాగా వచ్చిన ‘సిత్తరాల నవ్వు’ పాటకు మంచి స్పందన లభిస్తుండగా, ‘భగవంతుడు’ చిత్రం త్వరలోనే థియేటర్లలో ప్రేక్షకుల ముందుకు రానుంది.