ఫుజైరా: యూఏఈలో ఏడాది పొడవునా నిరంతరం ప్రవహించే ఏకైక సహజ జలపాతంగా గుర్తింపు పొందిన వాడీ వురయ్యా (Wadi Wurayah)ను సందర్శకులకు అందుబాటులోకి తీసుకొచ్చారు. ఫుజైరా హజర్ పర్వత శ్రేణుల్లో ఉన్న ఈ ప్రకృతి సంరక్షణ ప్రాంతాన్ని 2026 జనవరి నుంచి ప్రజలు సందర్శించేందుకు అనుమతిస్తున్నట్లు ఫుజైరా పర్యావరణ అథారిటీ వెల్లడించింది. అయితే పర్యావరణ పరిరక్షణ దృష్ట్యా సందర్శకులకు స్వేచ్ఛాయుత ప్రవేశం ఉండదని, హైకింగ్ సీజన్ అయిన అక్టోబర్ ప్రారంభం నుంచి మధ్య అక్టోబర్ వరకు మాత్రమే పరిమిత సంఖ్యలో అనుమతి ఇస్తున్నట్లు అధికారులు తెలిపారు.

ఆన్‌లైన్‌లో నమోదు తప్పనిసరి

వాడీ వురయ్యాను సందర్శించాలనుకునే వారు 'ఫుజైరా హాలిడేస్' ద్వారా నిర్వహించే అధికారిక టూర్‌లో ముందుగా నమోదు చేసుకోవాలి. 'Explore Wadi Wurayah' పేరుతో అందుబాటులో ఉన్న ఈ గైడెడ్ డే టూర్ ధర ఒక్కో వ్యక్తికి 300 దిర్హామ్‌ల నుంచి ప్రారంభమవుతుంది.

10 వేల ఏళ్లుగా ప్రవహిస్తున్న జలపాతం

వాడీ వురయ్యాలోని సహజ జలపాతం యూఏఈలో ఏడాది పొడవునా నీరు ప్రవహించే ఏకైక సహజ జలపాతంగా గుర్తింపు పొందింది. ఈ జలపాతానికి 60కుపైగా సహజ ఊటల నుంచి నీరు చేరుతుండగా, సుమారు 13 మీటర్ల ఎత్తు నుంచి నీరు కిందకు జాలువారుతుంది. భూగర్భ శాస్త్రవేత్తల అంచనా ప్రకారం ఈ జలపాతం దాదాపు 10 వేల ఏళ్లుగా నిరంతరంగా ప్రవహిస్తోంది.

అరుదైన జీవవైవిధ్యానికి నిలయం

సుమారు 220 చదరపు కిలోమీటర్ల విస్తీర్ణంలో ఉన్న ఈ ప్రకృతి రిజర్వ్‌లో ఇప్పటివరకు 1,099 జీవజాతులను గుర్తించారు. ఇందులో 216 రకాల వృక్షాలు, 114 పక్షి జాతులు, 20 క్షీరద జాతులు, 30 సరీసృపాలు, ఉభయచర జాతులు ఉన్నాయి. అంతరించిపోతున్న అరేబియన్ తహర్, బ్లాన్‌ఫోర్డ్ ఫాక్స్, కారాకల్ వంటి అరుదైన జంతువులు, యూఏఈలోనే ప్రత్యేకంగా కనిపించే అడవి ఆర్కిడ్ (Epipactis veratrifolia) వంటి అరుదైన మొక్కలు కూడా ఈ ప్రాంతంలో ఉన్నాయి.

2013 నుంచి పర్యాటకులకు మూసివేత

జీవవైవిధ్యాన్ని కాపాడేందుకు 2013లో ఈ ప్రాంతాన్ని పర్యాటకులకు మూసివేశారు. అయితే శాస్త్రవేత్తలు, పరిశోధకులు, విద్యార్థులకు మాత్రం పరిశోధనల కోసం అనుమతులు కొనసాగాయి. ఈ చర్యలతో పర్యావరణ వ్యవస్థ గణనీయంగా కోలుకుందని ఫుజైరా పర్యావరణ అథారిటీ పేర్కొంది.

యునెస్కో ప్రపంచ వారసత్వ గుర్తింపు

ఇటీవల వాడీ వురయ్యా యునెస్కో ప్రపంచ వారసత్వ జాబితాలో చోటు దక్కించుకుంది. యూఏఈ తరఫున ప్రపంచ వారసత్వ హోదా పొందిన మూడో ప్రదేశం, అలాగే సహజ వారసత్వ విలువల ఆధారంగా గుర్తింపు పొందిన తొలి ప్రాంతం ఇదే కావడం విశేషం. శాశ్వత మంచినీటి వనరులు, అరుదైన జీవవైవిధ్యం, ప్రత్యేక భౌగోళిక నిర్మాణం కారణంగా ఈ ప్రాంతానికి యునెస్కో గుర్తింపు లభించింది.