దోహా: అంతర్జాతీయ పర్యాటకుల రాక తగ్గినప్పటికీ, గల్ఫ్ కోఆపరేషన్ కౌన్సిల్ (GCC) దేశాల నుంచి పెరిగిన సందర్శకుల సంఖ్యతో ఖతార్ హాస్పిటాలిటీ రంగం 2026 రెండో త్రైమాసికంలో నిలకడను ప్రదర్శించింది. రియల్ ఎస్టేట్ పరిశోధనా సంస్థ వాల్యూస్ట్రాట్ (ValuStrat) విడుదల చేసిన నివేదిక ప్రకారం, GCC దేశాల నుంచి వచ్చిన పర్యాటకుల సంఖ్య త్రైమాసిక ప్రాతిపదికన 11 శాతం పెరిగి, మొత్తం విదేశీ సందర్శకుల్లో 40 శాతం వాటా సాధించింది.

రెండో త్రైమాసికంలో ఖతార్‌కు సుమారు 6 లక్షల మంది సందర్శకులు రాగా, ఈద్ సెలవుల ప్రభావంతో ఏప్రిల్ నుంచి మే మధ్య హోటళ్ల ఆక్యుపెన్సీ 28.7 శాతం పెరిగింది. అయితే మొత్తం త్రైమాసిక సగటు ఆక్యుపెన్సీ 51.9 శాతానికి పడిపోయి, గత ఏడాదితో పోలిస్తే 26.3 శాతం తగ్గింది. హోటళ్ల ఆదాయంపైనా ప్రభావం పడింది. సగటు రోజువారీ గది అద్దె (ADR) 380 ఖతార్ రియాల్స్ కు చేరి, ఏడాది ప్రాతిపదికన 16.2 శాతం తగ్గింది. అలాగే రెవెన్యూ పర్ అవైలబుల్ రూమ్ (RevPAR) 38.3 శాతం తగ్గి 197 ఖతార్ రియాల్స్ గా నమోదైంది.

అంతర్జాతీయ పర్యాటకుల సంఖ్య తగ్గడంతో ఖతార్ టూరిజం దేశీయ పర్యాటకాన్ని ప్రోత్సహించేందుకు 'హలా సమ్మర్', 'కిడ్స్ గో ఫ్రీ' వంటి ప్రత్యేక ప్రచార కార్యక్రమాలు చేపట్టింది. ఈ కార్యక్రమాలకు మంచి స్పందన లభించడంతో దేశీయ పర్యాటకం హాస్పిటాలిటీ రంగానికి కొంత మేర అండగా నిలిచింది. ప్రస్తుతం ఖతార్‌లో 42,131 హోటల్ గదులు అందుబాటులో ఉండగా, మరో 890 గదులు నిర్మాణ దశలో ఉన్నాయి. అయితే పర్యాటక డిమాండ్ పూర్తిగా పుంజుకోని నేపథ్యంలో కొన్ని కొత్త హోటళ్ల ప్రారంభాన్ని 2027 వరకు వాయిదా వేసే అవకాశం ఉందని నివేదిక వెల్లడించింది. భౌగోళిక, ఆర్థిక సవాళ్లు కొనసాగుతున్నప్పటికీ, ప్రాంతీయ పర్యాటకుల మద్దతు, దేశీయ ప్రచార కార్యక్రమాల కారణంగా ఖతార్ హాస్పిటాలిటీ రంగం నిలకడగా కొనసాగుతోందని నిపుణులు పేర్కొన్నారు.