మనామా: నివాస ప్రాంతాల్లో రహదారి తవ్వకాలు, నిర్మాణ పనులు, నిర్వహణ పనుల సమయాలపై బహ్రెయిన్‌లో కొత్త ప్రతిపాదన ముందుకు వచ్చింది. ఉదయం 7 గంటలకు ముందు, రాత్రి 8 గంటల తర్వాత శబ్దంతో కూడిన నిర్మాణ పనులను నిషేధించాలని ఐదుగురు ఎంపీలు ప్రతిపాదించారు. ఎంపీ బదర్ సాలెహ్ అల్ తమీమీ నేతృత్వంలో ఈ ప్రతిపాదనను రూపొందించారు. ఎంపీలు అబ్దుల్లా అల్ దాహెన్, అలీ అల్ నుఐమీ, అలీ సక్ర్ అల్ దోసరి, హిషామ్ అల్ అవాధీ దీనికి మద్దతు తెలిపారు.

ప్రతిపాదన ప్రకారం.. సాధారణ పనిదినాల్లో ఉదయం 7 గంటలకు, ప్రభుత్వ సెలవు రోజుల్లో ఉదయం 8 గంటలకు పనులు ప్రారంభించవచ్చు. అన్ని సాధారణ నిర్మాణ, నిర్వహణ పనులను రాత్రి 8 గంటల్లోపు పూర్తి చేయాల్సి ఉంటుంది.

ఏ పనులకు వర్తింపు?

రోడ్ల తవ్వకాలు, మురుగునీటి వ్యవస్థ పనులు, నీటి సరఫరా, విద్యుత్ నెట్‌వర్క్ పనులు, ఇతర మౌలిక వసతుల ప్రాజెక్టులకు ఈ నిబంధనలు వర్తించే అవకాశం ఉంది. అయితే నీరు లేదా విద్యుత్ సరఫరా నిలిచిపోవడం వంటి అత్యవసర పరిస్థితుల్లో చేపట్టే మరమ్మతులకు ఈ పరిమితుల నుంచి మినహాయింపు ఇవ్వనున్నారు.

ఫిర్యాదుల నేపథ్యంలో..

నివాస ప్రాంతాల్లో విశ్రాంతి సమయాల్లో నిర్మాణ పనుల వల్ల శబ్ద కాలుష్యంపై ప్రజల నుంచి పదేపదే ఫిర్యాదులు వస్తున్నాయని అల్ తమీమీ తెలిపారు. వృద్ధులు, చిన్నారులు, దివ్యాంగులు, అనారోగ్యంతో ఉన్నవారికి ఇబ్బందులు కలగకుండా ఈ నిబంధనలు దోహదపడతాయని చెప్పారు. అదే సమయంలో వేసవి కాలంలో కార్మికుల భద్రతను కూడా పరిగణనలోకి తీసుకున్నామని తెలిపారు.

కాగా, అత్యవసర మరియు ప్రజలకు అవసరమైన పనులను ఈ ప్రతిపాదన అడ్డుకోదని, సాధారణ నిర్మాణ పనులు మాత్రం ప్రజలకు ఇబ్బంది కలగని సమయాల్లో నిర్వహించడమే లక్ష్యమని ఎంపీలు పేర్కొన్నారు. ఇప్పటికే అమల్లో ఉన్న వేసవి మధ్యాహ్న సమయంలో పనులపై నిషేధం కూడా కొనసాగుతుందని తెలిపారు.