కువైట్ : కువైట్‌లో ఈ ఏడాది తొలి ఆరు నెలల్లో అన్ని రకాల హింసాత్మక నేరాలు గణనీయంగా తగ్గాయి. గత ఏడాదితో పోలిస్తే 53.2 శాతం తగ్గినట్లు న్యాయశాఖ మంత్రి నాసర్ అల్-సుమైత్ వెల్లడించారు. పబ్లిక్ ప్రాసిక్యూషన్‌కు వచ్చిన కేసుల ఆధారంగా ఈ గణాంకాలను వెల్లడించారు. 2025 తొలి ఆరు నెలల్లో 607 హింసాత్మక నేరాల కేసులు నమోదు కాగా.. 2026 తొలి ఆరు నెలల్లో ఆ సంఖ్య 284కి తగ్గింది. హత్య, హత్యాయత్నం కేసులు కూడా స్వల్పంగా తగ్గాయి. 2025 తొలి ఆరు నెలల్లో 26 కేసులు నమోదు కాగా.. ఈ ఏడాది అదే కాలంలో 24 కేసులు నమోదయ్యాయి. దీంతో ఈ విభాగంలో 7.7 శాతం తగ్గుదల నమోదైంది.

దాడులు, కొట్టడం వంటి కేసులు 63.6 శాతం తగ్గాయి. గత ఏడాది 376 కేసులు నమోదవగా.. ఈ ఏడాది 137 కేసులకు పడిపోయాయి. హత్య లేదా శారీరక హాని చేస్తామని బెదిరించిన కేసులు 43.4 శాతం తగ్గి 99 నుంచి 56కు చేరాయి. ఇక ఆత్మహత్య, ఆత్మహత్యాయత్నం కేసులు 44.3 శాతం తగ్గాయి. 2025లో 61 కేసులు నమోదవగా.. 2026లో 34 కేసులు నమోదయ్యాయి. తీవ్రమైన శారీరక గాయాలకు దారితీసిన గొడవల కేసులు కూడా 62.5 శాతం తగ్గి 16 నుంచి 6కి పడిపోయాయి.

కఠినమైన చట్టపరమైన సంస్కరణలు

గత రెండేళ్లలో కువైట్ ప్రభుత్వం క్రిమినల్ జస్టిస్ వ్యవస్థలో పలు కీలక చట్టపరమైన సంస్కరణలు తీసుకొచ్చిందని మంత్రి తెలిపారు. వ్యభిచారం చేస్తూ పట్టుబడిన భార్య లేదా మహిళా బంధువును హత్య చేసిన పురుషుడికి శిక్ష తగ్గించే నిబంధనను శిక్షాస్మృతి నుంచి తొలగించారు. అలాగే పరువు పోతుందనే కారణంతో ప్రసవం అనంతరం వెంటనే తన నవజాత శిశువును హత్య చేసిన తల్లికి ఉపశమనం కల్పించే నిబంధనను కూడా రద్దు చేశారు.

అనుకోకుండా మరణం లేదా గాయానికి కారణమైన సందర్భాల్లో శిక్షలను కఠినతరం చేయడంతో పాటు.. సరైన కారణం లేకుండా బహిరంగ ప్రదేశాల్లో కత్తులు, పదునైన ఆయుధాలను కలిగి ఉండటాన్ని నేరంగా ప్రకటించారు. వాటిని దాడులకు ఉపయోగించడం లేదా ప్రజల్లో భయాందోళనలు సృష్టించేందుకు వినియోగించడంపై కూడా కఠిన శిక్షలు అమలు చేస్తున్నారు.

అదేవిధంగా గృహ హింస నుంచి రక్షణ కోసం కొత్త చట్టాన్ని అమల్లోకి తీసుకొచ్చారు. పిల్లలు తమ తల్లిదండ్రులపై దాడి చేసే కేసులు, పిల్లలపై నేరాలు, అసహాయ వ్యక్తులపై జరిగే నేరాల్లో రాజీ లేదా కేసు ఉపసంహరణకు అవకాశం లేకుండా నిబంధనలు రూపొందించినట్లు న్యాయశాఖ మంత్రి నాసర్ అల్-సుమైత్ తెలిపారు.