మనామా: ఇరాన్‌ ఇస్లామిక్ రివల్యూషనరీ గార్డ్ కార్ప్స్‌ (IRGC) కోసం గూఢచర్యానికి పాల్పడినట్లు ఆరోపణలు ఎదుర్కొన్న ఇద్దరు వ్యక్తులకు బహ్రెయిన్‌ హై క్రిమినల్ కోర్టు జీవిత ఖైదు విధించింది. బహ్రెయిన్‌ భద్రత, జాతీయ ప్రయోజనాలకు నష్టం కలిగించే చర్యలకు సహకరించారని నిర్ధారించిన కోర్టు, స్వాధీనం చేసుకున్న వస్తువులను కూడా జప్తు చేయాలని ఆదేశించింది.

బహ్రెయిన్‌ పబ్లిక్ ప్రాసిక్యూషన్‌ వివరాల ప్రకారం.. నిందితులు ఇరాన్‌ IRGC, దాని ఏజెంట్లతో సంబంధాలు కొనసాగిస్తూ, బహ్రెయిన్‌ జాతీయ ప్రయోజనాలకు హాని కలిగించే శత్రు, ఉగ్రవాద చర్యలకు సహకరించినట్లు విచారణలో తేలింది.

సోషల్ మీడియా ఖాతాతో వెలుగులోకి..

బహ్రెయిన్‌ సైబర్ క్రైమ్ డైరెక్టరేట్‌ నిర్వహించిన దర్యాప్తులో ఈ వ్యవహారం వెలుగులోకి వచ్చింది. బహ్రెయిన్‌పై ఇరాన్‌ ఉగ్రదాడులకు మద్దతు తెలిపేలా ఉన్న ఓ సోషల్ మీడియా ఖాతాను అధికారులు గుర్తించారు.

ఆ ఖాతాను నిర్వహిస్తున్న వ్యక్తిని అరెస్టు చేయగా, తానే ఆ ఖాతాను నిర్వహిస్తున్నట్లు అతను అంగీకరించినట్లు ప్రాసిక్యూషన్‌ తెలిపింది. దేశం వెలుపల ఉన్న మరో అనుమానితుడితో తాను సంప్రదింపులు జరిపినట్లు, బహ్రెయిన్‌లోని వివిధ ప్రాంతాలకు సంబంధించిన ప్రదేశాలు, భౌగోళిక కోఆర్డినేట్లను అతనికి అందించినట్లు విచారణలో వెల్లడైనట్లు పేర్కొంది.

ఎలక్ట్రానిక్ ఆధారాలతో నేర నిర్ధారణ

నిందితుడి ఎలక్ట్రానిక్ పరికరాలపై నిర్వహించిన ఫోరెన్సిక్ పరీక్షలు, సాక్షుల వాంగ్మూలాలు, నిందితుడు ఇచ్చిన ప్రకటనలు కేసులో కీలక ఆధారాలుగా నిలిచాయని పబ్లిక్ ప్రాసిక్యూషన్‌ తెలిపింది.

రెండో నిందితుడు బహ్రెయిన్‌ వెలుపల ఉండటంతో అతనిపై అతని గైర్హాజరీలోనే విచారణ కొనసాగింది.

కేసు విచారణ అనేక దశల్లో జరిగిందని, నిందితులకు న్యాయవాది ద్వారా ప్రాతినిధ్యం పొందే హక్కుతో పాటు చట్టపరమైన అన్ని రక్షణలు కల్పించినట్లు ప్రాసిక్యూషన్‌ వెల్లడించింది.

జాతీయ భద్రతకు అత్యంత ప్రాధాన్యం

బహ్రెయిన్‌ జాతీయ భద్రతకు ముప్పు కలిగించే విదేశీ లేదా శత్రు సంస్థలతో అక్రమంగా సహకరించే, సంప్రదింపులు జరిపే వ్యక్తులపై కఠిన చర్యలు కొనసాగుతాయని పబ్లిక్ ప్రాసిక్యూషన్‌ స్పష్టం చేసింది. దేశ జాతీయ భద్రత, సార్వభౌమత్వాన్ని రక్షించడం తమ అత్యంత ప్రధాన ప్రాధాన్యత అని పేర్కొంది.