విశాఖపట్నం: విశాఖపట్నంలో ఆకలి రహిత సమాజాన్ని నిర్మించడమే లక్ష్యంగా పోలీస్ యంత్రాంగం ఒక అద్భుతమైన సామాజిక కార్యక్రమానికి శ్రీకారం చుట్టింది. విశాఖ నగర పోలీస్ కమిషనర్ (CP) శంఖబ్రత బాగ్చి ఆలోచన నుంచి రూపుదిద్దుకున్న ‘హంగర్ ఫ్రీ వైజాగ్’ (Hunger Free Vizag) ప్రాజెక్టులో భాగంగా నగరంలో ప్రత్యేకంగా ‘కమ్యూనిటీ ఫ్రిజ్‌ల’ను (ఫుడ్ బ్యాంకులు) ఏర్పాటు చేశారు. స్వాతంత్య్ర దినోత్సవాన్ని పురస్కరించుకుని ఆగస్టు 15న ఈ ఫుడ్ బ్యాంకులను అధికారికంగా ప్రారంభించనున్నారు. తొలిదశలో భాగంగా విశాఖ నగరంలోని అత్యంత కీలకమైన ఐదు ప్రాంతాల్లో ఈ భారీ కమ్యూనిటీ ఫ్రిజ్‌లను అందుబాటులోకి తెచ్చారు. పేదలు, నిరాశ్రయులు మరియు ఆకలితో అలమటించే ఏ ఒక్కరూ అర్ధాకలితో నిద్రపోకూడదనే ఉన్నతాశయంతో పోలీసు శాఖ ఈ మానవీయ ఉడతా భక్తి సేవకు నడుంబిగించింది.

ఆహారం ఉచితం..ఎవరైనా పెట్టొచ్చు, ఎవరైనా తినొచ్చు!

ఈ కమ్యూనిటీ ఫ్రిజ్‌ల నిర్వహణను స్థానిక హోటళ్లు, కేటరింగ్ నిర్వాహకుల భాగస్వామ్యం మరియు సాధారణ ప్రజల సహకారంతో కొనసాగించనున్నారు. ఇంట్లో మిగిలిపోయిన పరిశుభ్రమైన ఆహారాన్ని గానీ లేదా విశేష సందర్భాల్లో తయారు చేసిన అదనపు భోజనాన్ని గానీ ఎవరైనా వచ్చి ఈ ఫ్రిజ్‌లలో ఉంచవచ్చు. అలాగే, ఆకలితో ఉన్న పేద సాధులు, యాచకులు లేదా నిరాశ్రయులు ఎవరైనా సరే ఉచితంగా ఈ ఫ్రిజ్‌లోని ఆహారాన్ని తీసుకుని తమ ఆకలి తీర్చుకోవచ్చు. ఆహార వృథాను అరికట్టడంతో పాటు సమాజంలో దాతృత్వాన్ని, తోటివారి పట్ల బాధ్యతను పెంపొందించేందుకు ఈ కమ్యూనిటీ ఫ్రిజ్‌లు ఎంతో దోహదపడతాయని సీపీ శంఖబ్రత బాగ్చి తెలిపారు. విశాఖ పోలీసుల ఈ వినూత్న ఆలోచనపై నగర ప్రజల నుంచి, సామాజిక కార్యకర్తల నుంచి తీవ్ర ప్రశంసలు వ్యక్తమవుతున్నాయి.