సూపర్ స్టార్ రజినీకాంత్, లెక్కింపు లేని అంచనాలతో తెరకెక్కుతున్న మాస్ యాక్షన్ ఎంటర్‌టైనర్ ‘జైలర్-2’ నుంచి అభిమానులు ఎంతగానో ఎదురుచూస్తున్న ‘అల బోలెలో’ లిరికల్ సాంగ్ విడుదలయ్యింది. తమిళంతో పాటు తెలుగులోనూ ఏకకాలంలో విడుదలైన ఈ పాట ప్రస్తుతం సోషల్ మీడియాలో ట్రెండ్ అవుతోంది. రాక్‌స్టార్ అనిరుధ్ రవిచందర్ తనదైన మాస్ అండ్ ఎనర్జెటిక్ బీట్స్‌తో మరోసారి మ్యూజిక్ ప్రియులను ఊపేస్తున్నారు. ఈ పాటలో నటి, ప్రముఖ డాన్సర్ పూర్ణ వేసిన రఫిడ్ అండ్ గ్లామరస్ మూవ్స్ పాటకే ప్రత్యేక ఆకర్షణగా నిలిచాయి. ఆమె తన డ్యాన్స్ పెర్ఫార్మెన్స్‌తో ప్రేక్షకులను విపరీతంగా ఆకట్టుకుంది. అయితే, ఎంతగానో ఆశించిన రజినీకాంత్ డ్యాన్స్ స్టెప్పులు ఈ లిరికల్ వీడియోలో పెద్దగా కనిపించకపోవడం అభిమానులను కొంతవరకు నిరాశకు గురిచేసిందనే చెప్పాలి.

‘మనసిలాయో’ వైబ్స్..అక్టోబర్ 15న గ్రాండ్ రిలీజ్!

ఈ పాట విడుదలైన క్షణం నుంచే నెటిజన్ల మధ్య ఆసక్తికరమైన చర్చ మొదలైంది. గతంలో రజినీకాంత్ నటించిన ‘వేట్టయన్’ సినిమాలోని సూపర్ హిట్ ‘మనసిలాయో’ పాటలోని మంజూ వారియర్ డ్యాన్స్ వైబ్స్‌ను, ప్రస్తుత ‘అల బోలెలో’ సాంగ్‌లోని పూర్ణ డ్యాన్స్ శైలి పోలి ఉందంటూ నెటిజన్లు కామెంట్లు చేస్తున్నారు. ట్యూన్ అండ్ మేకింగ్ పరంగా కూడా ఆ పాట ఛాయలు కనిపిస్తున్నాయని కొందరు అభిప్రాయపడుతున్నారు. నెగెటివ్, పాజిటివ్ కామెంట్స్ ఏవి ఉన్నప్పటికీ అనిరుధ్ అందించిన మాస్ ట్యూన్ మాత్రం శ్రోతలను విశేషంగా ఆకట్టుకుంటోంది. ఈ మోస్ట్ ఎవైటెడ్ సీక్వెల్ చిత్రం అక్టోబర్ 15న ప్రపంచవ్యాప్తంగా థియేటర్లలోకి రాబోతున్నట్లు చిత్రబృందం అధికారికంగా స్పష్టం చేసింది.