దోహా: శాస్త్ర, సాంకేతిక రంగాల్లో ఖతార్ విద్యార్థులు అంతర్జాతీయ స్థాయిలో సత్తా చాటారు. థాయ్‌లాండ్‌లో నిర్వహించిన ‘మిత్ స్మాషర్స్’ (Myth Smashers) శాస్త్రీయ పోటీలో హైస్కూల్ విభాగంలో ఖతార్ ప్రపంచంలో తొలి స్థానాన్ని కైవసం చేసుకుంది. అంతర్జాతీయ అణు శక్తి సంస్థ (IAEA) సహకారంతో ‘అణు విజ్ఞానంపై అపోహలను తొలగించడం’ అనే అంశంపై ఈ పోటీ నిర్వహించారు. ఖతార్ తరఫున ఉమ్ హకీమ్ సెకండరీ స్కూల్ ఫర్ గర్ల్స్ విద్యార్థినులు ఫాతిమా అల్-బదర్, జైనబ్ ఒమర్, సిరీన్ అమ్ర్ పోటీలో పాల్గొన్నారు.

ఆగస్టు 19న ఫలితాలు

పోటీ ఫలితాలను ఆగస్టు 19న థాయ్‌లాండ్‌లోని చియాంగ్ మైలో జరిగిన ఐఏఈఏ ప్రాంతీయ సమావేశంలో ప్రకటించారు. సైన్స్, టెక్నాలజీ ప్రాజెక్ట్ కోఆర్డినేటర్ల సమావేశంలో ఖతార్ విద్యార్థినులు విజేతలుగా నిలిచినట్లు వెల్లడించారు. ఈ విజయానికి విద్యా, ఉన్నత విద్యా మంత్రిత్వ శాఖలోని సైన్స్, కంప్యూటర్ టెక్నాలజీ విభాగాల పర్యవేక్షకులతో పాటు ఉమ్ హకీమ్ పాఠశాలలోని కెమిస్ట్రీ, ఇన్ఫర్మేషన్ టెక్నాలజీ ఉపాధ్యాయుల కృషి కారణమని మంత్రిత్వ శాఖ తెలిపింది.

శాస్త్రీయ ఆలోచనకు ప్రోత్సాహం

విద్యార్థులు శాస్త్రీయ పరిజ్ఞానాన్ని పరిశోధన, ప్రశ్నించడం, ఆవిష్కరణలుగా మలచగల సామర్థ్యాన్ని ఈ విజయం చాటిచెప్పిందని మంత్రిత్వ శాఖ పేర్కొంది. ఆధునిక శాస్త్రీయ సవాళ్ల పరిష్కారంలో విద్యార్థుల భాగస్వామ్యాన్ని పెంచడంతో పాటు అంతర్జాతీయ వేదికలపై ఖతార్ ప్రతిష్ఠను ఈ విజయం మరింత పెంచిందని తెలిపింది. ‘మిత్ స్మాషర్స్’ పోటీ ద్వారా విద్యార్థుల్లో శాస్త్రీయ పరిశోధన, విమర్శనాత్మక ఆలోచన, విశ్లేషణ, ఆధారాలతో నిర్ణయాలు తీసుకునే నైపుణ్యాలను పెంపొందిస్తారు. ముఖ్యంగా అణు విజ్ఞానం, సాంకేతికతకు సంబంధించిన అపోహలను తొలగించి, ఆధారాలు మరియు విశ్వసనీయ సమాచారంపై ఆధారపడిన శాస్త్రీయ అవగాహనను పెంచడం ఈ పోటీ ప్రధాన ఉద్దేశం. ఖతార్ విద్యార్థులు ప్రపంచస్థాయిలో తొలి స్థానం సాధించడం దేశ విద్యా వ్యవస్థ నాణ్యతకు, విద్యార్థుల ప్రతిభకు నిదర్శనమని మంత్రిత్వ శాఖ పేర్కొంది.