అబుదాబి: అబుదాబిలో అమలవుతున్న కొత్త అద్దె పరిమితి నిబంధనలు అద్దెదారులకు మరింత ఊరట అందించవచ్చని ప్రముఖ రియల్ ఎస్టేట్ కన్సల్టెన్సీ సంస్థ కొల్లియర్స్ పేర్కొంది. అద్దెదారులు మారిన సమయంలో కూడా అద్దెను భారీగా పెంచే విషయంలో ఇంటి యజమానులపై పరిమితులు ఉండటం వల్ల, ప్రస్తుత అద్దెదారులను మార్చి అధిక అద్దె చెల్లించే కొత్త వారిని తీసుకురావాలనే ఆసక్తి యజమానుల్లో తగ్గవచ్చని తెలిపింది. దీంతో అద్దెదారులు ఎక్కువకాలం ఒకే ఇంట్లో కొనసాగేందుకు అవకాశం పెరగడంతో పాటు, తరచూ ఇళ్లు మారాల్సిన అవసరం తగ్గవచ్చని విశ్లేషించింది. ముఖ్యంగా ఇటీవల కాలంలో అబుదాబిలో అద్దెలు గణనీయంగా పెరిగిన నేపథ్యంలో ఈ నిబంధనలు గృహ వ్యయాలపై అద్దెదారులకు కొంత భరోసాను కల్పించవచ్చని పేర్కొంది.

అయితే ఈ నిబంధనల కారణంగా ఇంటి యజమానులు స్వల్పకాలంలో అద్దె ఆదాయాన్ని పెంచుకునే అవకాశాలు పరిమితం కావచ్చని కొల్లియర్స్ తెలిపింది. ఫలితంగా కొన్ని ఆస్తులపై వచ్చే పెట్టుబడి రాబడులపై కూడా ఒత్తిడి పడే అవకాశం ఉందని పేర్కొంది. ఈ పరిణామం అబుదాబి నివాస అద్దె మార్కెట్‌లో ఇప్పటికే కనిపిస్తున్న మితమైన పరిస్థితుల మధ్య చోటుచేసుకుంది.  

కొల్లియర్స్ గణాంకాల ప్రకారం..  2026 రెండో త్రైమాసికంలో అబుదాబిలో సగటు అపార్ట్‌మెంట్ అద్దెలు 2 శాతం తగ్గగా, విల్లాల అద్దెలు 3 శాతం తగ్గాయి. అయితే గత ఏడాదితో పోలిస్తే అద్దెలు ఇంకా అధిక స్థాయిలోనే ఉన్నాయి. వార్షిక ప్రాతిపదికన అపార్ట్‌మెంట్ అద్దెలు 7 శాతం పెరగగా, విల్లాల అద్దెలు 5 శాతం పెరిగాయి. ఈ నిబంధనల్లో ముఖ్యమైన అంశం ఏమిటంటే, తాజాగా పూర్తయిన కొత్త నివాస ప్రాజెక్టులకు ఈ అద్దె పరిమితి నుంచి మినహాయింపు ఉంది. దీంతో కొత్త ఇళ్ల యజమానులు ప్రస్తుత మార్కెట్ పరిస్థితులు, డిమాండ్‌కు అనుగుణంగా అద్దెను నిర్ణయించుకునే అవకాశం ఉంటుంది. ఈ పరిస్థితి అబుదాబిలో రెండు స్థాయిల అద్దె మార్కెట్ ఏర్పడేందుకు దారితీయవచ్చని కొల్లియర్స్ అంచనా వేసింది.

ఇప్పటికే ఉన్న, నిబంధనల పరిధిలోని నివాసాల్లో అద్దె పెరుగుదల పరిమితంగా ఉండగా, కొత్తగా నిర్మించిన ప్రాజెక్టుల్లో మార్కెట్ పరిస్థితులకు అనుగుణంగా అద్దెలను నిర్ణయించేందుకు యజమానులకు ఎక్కువ స్వేచ్ఛ ఉంటుంది. ఒక అద్దెదారు వెళ్లిన తర్వాత కొత్త వ్యక్తికి భారీగా అద్దె పెంచే అవకాశం ఇంటి యజమానులకు తగ్గితే, ప్రస్తుత అద్దెదారులను మార్చాలనే ఆర్థిక ప్రయోజనం కూడా తగ్గుతుందని కొల్లియర్స్ పేర్కొంది.

దీంతో అద్దె ఒప్పందాల పునరుద్ధరణలు పెరిగే అవకాశం ఉండటంతో పాటు, అద్దెదారులు తరచూ ఒక ప్రాంతం నుంచి మరొక ప్రాంతానికి మారే పరిస్థితి తగ్గవచ్చని తెలిపింది. ఇప్పటికే 2026 రెండో త్రైమాసికంలో అబుదాబి లీజింగ్ కార్యకలాపాల్లో ఎక్కువ భాగం పాత అద్దె ఒప్పందాల పునరుద్ధరణలే ఉన్నాయని కొల్లియర్స్ వెల్లడించింది. మార్కెట్ క్రమంగా మితమైన దశలోకి ప్రవేశిస్తున్న నేపథ్యంలో అద్దెదారుల కదలిక తగ్గుతున్నట్లు ఇది సూచిస్తోందని పేర్కొంది.

ఈ అద్దె పరిమితి నిబంధనలను భవిష్యత్‌లో ఎప్పుడు, ఏ విధంగా సవరించనున్నారు లేదా తొలగించనున్నారు అన్నది గమనించాల్సిన ముఖ్యమైన అంశమని కొల్లియర్స్ తెలిపింది. అయితే మార్కెట్ పరిస్థితులు ఇదే విధంగా మితంగా కొనసాగితే, భవిష్యత్‌లో అద్దె పరిమితిని తొలగించినప్పటికీ అద్దెలు ఒక్కసారిగా భారీగా పెరిగే అవకాశం తక్కువగా ఉంటుందని సంస్థ అంచనా వేసింది. మొత్తంగా, అబుదాబి అద్దె పరిమితి నిబంధనలు ప్రస్తుత అద్దెదారులకు గృహ వ్యయాలపై మరింత స్థిరత్వాన్ని అందించడంతో పాటు, ఒకే నివాసంలో ఎక్కువకాలం కొనసాగేందుకు ప్రోత్సాహం ఇవ్వవచ్చని కొల్లియర్స్ విశ్లేషించింది.