మస్కట్: దోహా నుంచి బెంగళూరుకు బయలుదేరిన ఇండిగో విమానం సిబ్బందిలో ఒకరికి అకస్మాత్తుగా వైద్య అత్యవసర పరిస్థితి తలెత్తడంతో విమానాన్ని మస్కట్‌కు మళ్లించారు. ఒమన్‌లోని మస్కట్ అంతర్జాతీయ విమానాశ్రయంలో విమానం ల్యాండ్ అయిన వెంటనే ఎయిర్‌పోర్ట్ వైద్య బృందాలు సంబంధిత సిబ్బందికి అత్యవసర చికిత్స అందించాయి. ప్రస్తుతం వారు కోలుకున్నట్లు సమాచారం.

ప్రయాణికులకు అసౌకర్యం కలగకుండా ఉండేందుకు ఇండిగో ప్రత్యామ్నాయ విమానంతో పాటు కొత్త విమాన సిబ్బందిని ఏర్పాటు చేసింది. దీంతో ప్రయాణికులను మస్కట్ నుంచి వారి తుది గమ్యస్థానమైన బెంగళూరుకు తరలించే ఏర్పాట్లు చేసింది. విమానం కోసం వేచి ఉన్న సమయంలో మస్కట్ అంతర్జాతీయ విమానాశ్రయంలో ప్రయాణికులకు రిఫ్రెష్‌మెంట్స్ అందించడంతో పాటు ఎప్పటికప్పుడు విమాన పరిస్థితిపై సమాచారం అందించారు. ఈ ఘటనతో ప్రయాణికులకు కలిగిన అసౌకర్యానికి ఇండిగో సంస్థ విచారం వ్యక్తం చేసింది. ప్రయాణికులు, విమాన సిబ్బంది, విమాన భద్రత తమకు అత్యంత ప్రాధాన్యమని సంస్థ స్పష్టం చేసింది.