మస్కట్: ఒమన్ సుల్తానేట్, యునైటెడ్ కింగ్‌డమ్ (యూకే) మధ్య ద్వైపాక్షిక సంబంధాలు, సహకారాన్ని మరింత బలోపేతం చేసే అంశాలపై మస్కట్‌లో సంయుక్త ఒమన్-యూకే వర్కింగ్ గ్రూప్ 18వ సమావేశం జరిగింది. ఈ సమావేశానికి ఒమన్ విదేశాంగ మంత్రిత్వ శాఖ రాజకీయ వ్యవహారాల అండర్ సెక్రటరీ షేక్ ఖలీఫా అలీ అల్ హార్తీ, బ్రిటన్ విదేశీ, కామన్వెల్త్ అండ్ డెవలప్‌మెంట్ కార్యాలయంలో మిడిల్ ఈస్ట్, ఉత్తర ఆఫ్రికా, అఫ్గానిస్తాన్, పాకిస్థాన్ వ్యవహారాల రాష్ట్ర మంత్రి స్టీఫెన్ డౌటీ సంయుక్తంగా అధ్యక్షత వహించారు. ఒమన్, బ్రిటన్ మధ్య కొనసాగుతున్న ద్వైపాక్షిక సహకార సంబంధాలను ఇరు దేశాల ప్రతినిధులు సమీక్షించారు. పరస్పర ప్రయోజనాలకు సంబంధించిన పలు రంగాల్లో ఈ సంబంధాలను మరింత విస్తరించేందుకు ఉన్న అవకాశాలపై చర్చించారు.

విద్య, శిక్షణ, క్రీడల రంగాలపై దృష్టి

విద్యా రంగ అభివృద్ధి, వృత్తిపరమైన శిక్షణ, క్రీడల అభివృద్ధిలో బ్రిటన్‌కు ఉన్న నైపుణ్యం, అనుభవాన్ని వినియోగించుకునే అంశంపై ఇరు దేశాలు చర్చించాయి. అదే విధంగా పర్యాటక రంగంలో పరస్పర రాకపోకలను పునరుజ్జీవింపజేయడం, రెండు దేశాల మధ్య సాంస్కృతిక మార్పిడి, కార్యక్రమాల్లో భాగస్వామ్యాన్ని పెంచడం వంటి అంశాలను కూడా పరిశీలించారు.

ప్రాంతీయ, అంతర్జాతీయ అంశాలపై కూడా ఇరు పక్షాలు తమ అభిప్రాయాలను పంచుకున్నాయి. హోర్ముజ్ జలసంధిలో ప్రస్తుతం నెలకొన్న పరిస్థితికి దౌత్యపరమైన పరిష్కారాలను కనుగొనేందుకు ఒమన్ చేస్తున్న ప్రయత్నాలను సమావేశంలో ప్రత్యేకంగా ప్రస్తావించారు. ఉద్రిక్తతలను తగ్గించడం, ప్రాంతీయ భద్రత, స్థిరత్వాన్ని ప్రోత్సహించడం లక్ష్యంగా ఒమన్ కృషి చేస్తోందని పేర్కొన్నారు.
ఈ సమావేశానికి ఒమన్‌లో బ్రిటన్ రాయబారి డాక్టర్ లియాన్ సాండర్స్తో పాటు ఒమన్ విదేశాంగ మంత్రిత్వ శాఖ అధికారులు, సంబంధిత ప్రభుత్వ సంస్థల ప్రతినిధులు హాజరయ్యారు