తెలంగాణ: బస్సులో ప్రయాణికుడు మర్చిపోయిన రూ.3 లక్షల నగదును టీజీఎస్‌ఆర్టీసీ కండక్టర్ నిజాయితీగా తిరిగి అప్పగించారు. హజ్ (Honesty Conductor) యాత్రకు వెళ్లేందుకు సిద్ధమవుతున్న ఓ దంపతులకు సంబంధించిన నగదును ఎలాంటి స్వార్థానికి తావులేకుండా భద్రపరిచి తిరిగి అందించిన కండక్టర్ సరిత, డ్రైవర్ నరసింహులు ఇప్పుడు ప్రశంసలు అందుకుంటున్నారు.

భార్యతో కలిసి హజ్ యాత్రకు వెళ్లేందుకు:
వివరాల్లోకి వెళ్తే.. రంగారెడ్డి జిల్లా షాద్‌నగర్‌కు చెందిన వ్యాపారవేత్త జహంగీర్ తన భార్యతో కలిసి హజ్ యాత్రకు వెళ్లేందుకు హైదరాబాద్ బయలుదేరారు. యాత్ర ఖర్చుల కోసం రూ.3 లక్షల నగదును బ్యాగులో పెట్టుకుని టీజీఎస్‌ఆర్టీసీ బస్సులో ప్రయాణించారు. బస్సు అఫ్జల్‌గంజ్ చేరుకున్న తర్వాత దంపతులు నాంపల్లి వైపు వెళ్లేందుకు హడావుడిగా దిగిపోయారు. అయితే నగదు ఉన్న బ్యాగ్‌ను బస్సులోనే మర్చిపోయారు.

కొంతదూరం వెళ్లిన తర్వాత బ్యాగ్ గుర్తుకు రావడంతో జహంగీర్ ఆందోళనకు గురయ్యారు. వెంటనే తిరిగి బస్‌స్టాండ్‌కు చేరుకుని బ్యాగ్ కోసం ఆరా తీశారు. ఇదే సమయంలో బస్సులో ప్రయాణికులంతా దిగిన తర్వాత కండక్టర్ సరిత బస్సును పరిశీలించగా సీటులో బ్యాగ్ కనిపించింది. అందులో భారీ మొత్తంలో నగదు ఉన్నట్లు గుర్తించిన ఆమె వెంటనే డ్రైవర్ నరసింహులుకు సమాచారం అందించి బ్యాగ్‌ను భద్రపరిచారు.

తిరిగి వచ్చిన జహంగీర్ నుంచి వివరాలు తెలుసుకున్న అనంతరం కండక్టర్ సరిత, డ్రైవర్ నరసింహులు రూ.3 లక్షల నగదు ఉన్న బ్యాగ్‌ను యథాతథంగా అప్పగించారు. దీంతో హజ్ యాత్రికుడైన జహంగీర్ ఊపిరి పీల్చుకున్నారు. ఆర్టీసీ సిబ్బందికి కృతజ్ఞతలు తెలిపారు. ఈ ఘటనపై తెలంగాణ రవాణాశాఖ మంత్రి పొన్నం ప్రభాకర్ కూడా స్పందించి కండక్టర్ సరిత నిజాయితీని ప్రశంసించినట్లు తాజా నివేదికలు వెల్లడించాయి. షాద్‌నగర్ డిపో అధికారులు సైతం ఆమెను అభినందించారు. ప్రజల నమ్మకాన్ని నిలబెట్టేలా ఆర్టీసీ ఉద్యోగులు వ్యవహరించడం అభినందనీయమని పలువురు పేర్కొంటున్నారు.