భారత క్రికెట్‌లోకి ఆర్టిఫిషియల్ ఇంటెలిజెన్స్ దిగ్గజం ChatGPT అధికారికంగా అడుగుపెట్టింది. బీసీసీఐ అధికారిక ప్రకటన ప్రకారం, BCCI ChatGPTను క్యాంపా, SBI లైఫ్‌లతో కలిసి టీమ్ ఇండియా హోమ్ క్రికెట్‌కు అసోసియేట్ పార్ట్‌నర్‌గా ఎంపిక చేశారు. ఈ భాగస్వామ్యం రెండు హోమ్ సీజన్ల పాటు కొనసాగనుంది.

మొత్తం మూడు భాగస్వామ్యాల విలువ రూ.130 కోట్ల:
ఈ ఒప్పందం భారత జట్టు స్వదేశంలో ఆడే అంతర్జాతీయ మ్యాచ్‌లతో ప్రారంభమై 2028 మార్చి వరకు కొనసాగుతుంది. మొత్తం మూడు భాగస్వామ్యాల విలువ రూ.130 కోట్లకు పైగా ఉంటుందని బీసీసీఐ వెల్లడించింది. గత ఒప్పందంతో పోలిస్తే ఈసారి భాగస్వామ్యాల విలువ దాదాపు 44 శాతం పెరిగింది. భారత క్రికెట్‌కు ఉన్న భారీ ప్రేక్షకాదరణ, వాణిజ్య విలువకు ఇది నిదర్శనమని బీసీసీఐ పేర్కొంది.

ఈ భాగస్వామ్యంలో క్యాంపా అత్యధిక బిడ్ వేసిన సంస్థగా నిలిచింది. SBI లైఫ్‌తో పాటు ChatGPT ఒక్కో మ్యాచ్‌కు సుమారు రూ.1.2 కోట్ల చొప్పున బిడ్ చేసినట్లు సమాచారం. మొత్తం ప్యాకేజీలో 35 మ్యాచ్‌లకు సంబంధించిన హక్కులు ఉన్నట్లు వార్తా నివేదికలు వెల్లడించాయి. అయితే ChatGPT బ్రాండ్ లోగో టీమ్ ఇండియా జెర్సీపై కనిపించదు. అసోసియేట్ పార్ట్‌నర్లకు ప్రసార గ్రాఫిక్స్, మైదానంలోని బ్రాండింగ్, బౌండరీ ప్రాంతాల్లో ప్రకటనల ద్వారా ప్రచారం కల్పిస్తారు. ప్రస్తుతం టీమ్ ఇండియా జెర్సీపై ప్రధాన స్పాన్సర్‌గా అపోలో టైర్స్ కొనసాగుతోంది.

భారత్-వెస్టిండీస్ హోమ్ సిరీస్‌తో ఈ కొత్త భాగస్వామ్యం ప్రారంభం కానుంది. వెస్టిండీస్ పర్యటన సెప్టెంబర్ 27, 2026న ప్రారంభమై మూడు వన్డేలు, ఐదు టీ20 మ్యాచ్‌లతో సాగనుంది. క్రికెట్‌కు ప్రపంచవ్యాప్తంగా ఉన్న ఆదరణను దృష్టిలో పెట్టుకుని ChatGPT వంటి AI బ్రాండ్ బీసీసీఐతో భాగస్వామ్యం కావడం టెక్నాలజీ, స్పోర్ట్స్ మార్కెటింగ్ రంగాల కలయికకు కొత్త ఉదాహరణగా నిలుస్తోంది. అభిమానులతో మరింత వినూత్నంగా అనుసంధానం కావడానికి ఈ భాగస్వామ్యం ఉపయోగపడుతుందని బీసీసీఐ భావిస్తోంది.