దుబాయ్: తక్కువ ధరల విమాన సేవలకు పేరుగాంచిన విజ్ ఎయిర్ (Wizz Air) మళ్లీ యూఏఈకి విమాన సేవలను ప్రారంభించనుంది. గత ఏడాది అబుదాబి అనుబంధ సంస్థ కార్యకలాపాలను నిలిపివేసిన ఈ బడ్జెట్ ఎయిర్‌లైన్.. తాజాగా దుబాయ్, అబుదాబితో పాటు జెడ్డా, అమ్మాన్ నగరాలకు విమాన సర్వీసులను పునరుద్ధరించనున్నట్లు ప్రకటించింది.

విజ్ ఎయిర్ తన ఇన్‌స్టాగ్రామ్ పోస్టులో ఈ విషయాన్ని వెల్లడించింది. మొత్తం 12 రూట్లలో వారానికి 49 విమానాలు నడపనున్నట్లు తెలిపింది. దుబాయ్, అబుదాబి నుంచి వారపు విమాన సర్వీసులు అందుబాటులోకి రానున్నాయి.

అక్టోబర్ 25 నుంచి విమానాలు

విజ్ ఎయిర్ అధికారిక వెబ్‌సైట్‌లోని వివరాల ప్రకారం.. దుబాయ్, అబుదాబి నుంచి తదుపరి అందుబాటులో ఉన్న విమాన ప్రయాణ తేదీ అక్టోబర్ 25గా ఉంది. ప్రయాణికుడికి టికెట్ ధర ధ289 నుంచి ప్రారంభమవుతోంది.

వెబ్‌సైట్‌లో ప్రతిరోజూ విమానాల బుకింగ్ అవకాశాలు కూడా కనిపిస్తున్నాయి. అయితే శీతాకాల ప్రయాణ సీజన్ సమీపించే కొద్దీ టికెట్ ధరలు పెరిగే అవకాశం ఉన్నట్లు వివరాలు సూచిస్తున్నాయి.

2025లో అబుదాబి కార్యకలాపాలకు విరామం

విజ్ ఎయిర్ తన అబుదాబి కార్యకలాపాలను 2025 సెప్టెంబర్ 1న నిలిపివేసింది. భౌగోళిక-రాజకీయ పరిస్థితులు, నియంత్రణపరమైన సవాళ్లు, తీవ్ర పోటీ వంటి కారణాలతో అబుదాబి జాయింట్ వెంచర్ నుంచి వైదొలుగుతున్నట్లు అప్పట్లో సంస్థ ప్రకటించింది.

విజ్ ఎయిర్ అబుదాబి..అబుదాబి డెవలప్‌మెంటల్ హోల్డింగ్ కంపెనీ (ADQ), హంగేరీకి చెందిన అల్ట్రా-లో-కాస్ట్ ఎయిర్‌లైన్ విస్ ఎయిర్ హోల్డింగ్స్ మధ్య జాయింట్ వెంచర్‌గా కార్యకలాపాలు నిర్వహించింది.

2024లో 3.5 మిలియన్లకు పైగా ప్రయాణికులు

2024లో విజ్ ఎయిర్ అబుదాబి నుంచి 19,000కు పైగా విమానాలను నడిపింది. అదే ఏడాది 3.5 మిలియన్లకు పైగా పాయింట్-టు-పాయింట్ ప్రయాణికులను గమ్యస్థానాలకు చేర్చినట్లు అబుదాబి మీడియా ఆఫీస్ వెల్లడించింది.

2024లోనే ఎయిర్‌లైన్ తొలిసారిగా ‘విస్ మల్టీపాస్’, ‘ఆల్ యూ కెన్ ఫ్లై’ వంటి విమాన సబ్‌స్క్రిప్షన్ మోడళ్లను కూడా ప్రవేశపెట్టింది. ఇవి రెండు సార్లు 48 గంటల్లోనే పూర్తిగా విక్రయించబడ్డాయి.

బడ్జెట్ ఎయిర్‌లైన్ల మధ్య తీవ్ర పోటీ

అతి తక్కువ ధరల విమాన సేవల మోడల్ కారణంగా విజ్ ఎయిర్ అబుదాబి.. ఎయిర్ అరేబియా, జజీరా ఎయిర్‌వేస్, ఫ్లైనాస్ తదితర స్థానిక, ప్రాంతీయ బడ్జెట్ ఎయిర్‌లైన్ల నుంచి గట్టి పోటీని ఎదుర్కొంది.

తాజా పునరాగమనంతో యూఏఈ నుంచి తక్కువ ధరల్లో ప్రయాణించాలనుకునే ప్రయాణికులకు మరో విమాన ఎంపిక అందుబాటులోకి రానుంది.