మస్కట్: ఒమన్‌లోని భారతీయ పాఠశాలల విద్యార్థులు ఉన్నత విద్య, కెరీర్‌ అవకాశాలపై సరైన నిర్ణయాలు తీసుకునేందుకు ‘అవెనీర్ 2026’ (Avenir 2026) పేరుతో రెండు రోజుల ఉన్నత విద్య, కెరీర్‌ ఫెయిర్‌ నిర్వహించనున్నారు. భారతీయ పాఠశాలల ఒమన్ బోర్డ్‌ ఆఫ్‌ డైరెక్టర్స్‌ ఆధ్వర్యంలో, ఇండియన్ స్కూల్ సీబ్ ఆతిథ్యంతో ఈ కార్యక్రమం జరగనుంది. అక్టోబర్ 2, 3 తేదీల్లో మస్కట్ హాలిడే హోటల్‌లో ఈ ఫెయిర్‌ నిర్వహించనున్నట్లు నిర్వాహకులు తెలిపారు.

ఒకే వేదికపై ప్రముఖ విద్యాసంస్థలు

వివిధ దేశాలకు చెందిన యూనివర్సిటీలు, కాలేజీలు, ఉన్నత విద్యాసంస్థలు ఈ ఫెయిర్‌లో పాల్గొని తమ విద్యా కార్యక్రమాలు, ప్రవేశ మార్గాలను విద్యార్థులు, తల్లిదండ్రులకు పరిచయం చేయనున్నాయి. విద్యార్థులు ఆయా విద్యాసంస్థల ప్రతినిధులతో నేరుగా మాట్లాడి వివిధ కోర్సులు, ప్రవేశ అర్హతలు, అడ్మిషన్‌ ప్రక్రియ, స్కాలర్‌షిప్‌ అవకాశాలు, భవిష్యత్‌ కెరీర్‌ మార్గాలపై వివరాలు తెలుసుకునే అవకాశం ఉంటుంది.

 కోర్సులపై సమాచారం

‘అవెనీర్ 2026’లో ఇంజినీరింగ్‌, టెక్నాలజీ, మెడిసిన్‌, హెల్త్‌ సైన్సెస్‌, బిజినెస్‌ అండ్‌ మేనేజ్‌మెంట్‌, ఫైనాన్స్‌, లా, డిజైన్‌, ఆర్కిటెక్చర్‌, మీడియా అండ్‌ కమ్యూనికేషన్‌ వంటి విభాగాలపై సమాచారం అందుబాటులో ఉంటుంది. అదేవిధంగా కంప్యూటర్‌ సైన్స్‌, ఆర్టిఫిషియల్‌ ఇంటెలిజెన్స్‌, డేటా సైన్స్‌, హాస్పిటాలిటీ అండ్‌ టూరిజం, హ్యూమానిటీస్‌, సోషల్‌ సైన్సెస్‌తో పాటు భవిష్యత్‌ ఉద్యోగ అవకాశాలకు అనుగుణంగా అభివృద్ధి చెందుతున్న కొత్త కోర్సులను కూడా విద్యార్థులు తెలుసుకోవచ్చు.

విద్యార్థులు, తల్లిదండ్రులకు ఉపయోగకరం

ఉన్నత విద్య విషయంలో విద్యార్థులు, తల్లిదండ్రులకు సరైన సమాచారం అందించడంతో పాటు వివిధ దేశాల్లోని విద్యా అవకాశాలను పోల్చుకునేందుకు ఈ ఫెయిర్‌ ఉపయోగపడుతుందని నిర్వాహకులు తెలిపారు. ప్రపంచంలోని వివిధ ప్రాంతాలకు చెందిన ఉన్నత విద్యాసంస్థలు ఈ కార్యక్రమంలో పాల్గొననున్నాయి. దీంతో విద్యార్థులకు ఒకే వేదికపై విభిన్న విద్యా మార్గాలను తెలుసుకునే అవకాశం లభించనుందని భారతీయ పాఠశాలల ఒమన్ బోర్డ్‌ ఆఫ్‌ డైరెక్టర్స్‌ ఛైర్మన్ సయ్యద్ అహ్మద్ సల్మాన్ తెలిపారు.