దుబాయ్: యూఏఈ లో కొత్త విద్యా సంవత్సరం ప్రారంభం కావడంతో విద్యార్థులు కొత్త తరగతుల్లోకి మారడం, తల్లిదండ్రులు కొత్త వాట్సాప్ గ్రూపుల్లో చేరడం మొదలైంది. అయితే ఈసారి కొన్ని పాఠశాలలు తల్లిదండ్రులు, ఉపాధ్యాయుల మధ్య కమ్యూనికేషన్‌ కోసం ప్రత్యేక వాట్సాప్ గ్రూప్ పాలసీలను అమలు చేస్తున్నాయి. ఆగస్టు 31న యూఏఈ లో పాఠశాలలు తిరిగి ప్రారంభమైన తర్వాత కొత్త క్లాస్ గ్రూపులు ఏర్పడ్డాయి. ఇందులో స్కూల్ రిమైండర్లు, హోంవర్క్, ప్రశ్నలు, ముఖ్యమైన ప్రకటనలు వంటి సమాచారం షేర్ చేస్తున్నారు. అయితే గ్రూపుల్లో ఎక్కువ చర్చలు, తల్లిదండ్రుల మధ్య అభిప్రాయ భేదాలు, వ్యక్తిగత సమస్యలపై చర్చలు మొదలైతే అసలు ఉద్దేశం దెబ్బతినే అవకాశం ఉందని పాఠశాలలు చెబుతున్నాయి.

కమ్యూనికేషన్‌కు వాట్సాప్ ముఖ్యమా?

2025లో Teaching and Teacher Education జర్నల్‌లో ప్రచురితమైన ఒక అధ్యయనం ప్రకారం.. తల్లిదండ్రులు, ఉపాధ్యాయుల మధ్య కమ్యూనికేషన్‌ను వాట్సాప్ మెరుగుపరచగలదు. సమాచారం వెంటనే అందడం, అందుబాటులో ఉండటం, తల్లిదండ్రులు-ఉపాధ్యాయుల మధ్య అనుబంధం పెరగడం వంటి ప్రయోజనాలు ఉన్నాయని పరిశోధకులు గుర్తించారు. అయితే తల్లిదండ్రుల జోక్యం ఎక్కువైతే ఉపాధ్యాయుల అధికారాన్ని ప్రభావితం చేసే అవకాశం ఉందని అధ్యయనం హెచ్చరించింది. అందుకే వాట్సాప్ గ్రూపులు ఎలా ఉపయోగించాలనే దానిపై స్పష్టమైన నిబంధనలు ఉండటం అవసరమని పేర్కొంది.

రాత్రి 8 గంటల తర్వాత మెసేజ్‌లు వద్దు

షార్జా ఇండియన్ స్కూల్ (Sharjah Indian School)లో ఉపాధ్యాయులు, తల్లిదండ్రుల వాట్సాప్ గ్రూపులను ప్రధానంగా సమాచారాన్ని పంచుకునేందుకు ఉపయోగిస్తున్నారు. సాధారణంగా ఉపాధ్యాయులే గ్రూప్ అడ్మిన్లుగా ఉంటారు. స్కూల్ ప్రిన్సిపల్ ప్రమోద్ మహాజన్ మాట్లాడుతూ.. వాట్సాప్ అత్యవసర పరిస్థితి మినహా ఉపాధ్యాయులు రాత్రి 8 గంటల తర్వాత మెసేజ్‌లు పంపకూడదని మార్గదర్శకాలు ఉన్నాయని తెలిపారు. స్కూల్ సమయంలో ఉపాధ్యాయులకు Wi-Fi అందుబాటులో ఉండదని, అధికారిక విధులు పూర్తయ్యాకే సాధారణంగా సందేశాలు పంపుతారని చెప్పారు. వాట్సాప్ గ్రూపులు ప్రధానంగా సమాచారాన్ని పంచుకునేందుకేనని, వ్యక్తిగత వ్యాఖ్యలు లేదా వ్యక్తిగత చర్చలకు వాటిని ఉపయోగించకూడదని సూచించారు. తల్లిదండ్రులు ఉపాధ్యాయులతో నేరుగా మాట్లాడేందుకు స్కూల్ డైరీ, పోర్టల్ వంటి ఇతర మార్గాలు కూడా అందుబాటులో ఉన్నాయని తెలిపారు.

వ్యక్తిగత, వివాదాస్పద వ్యాఖ్యలకు నో

కొన్నిసార్లు వాట్సాప్ గ్రూపుల్లో చర్చలు అసలు ఉద్దేశాన్ని దాటి వెళ్లే సందర్భాలు ఉంటాయని ప్రిన్సిపల్ తెలిపారు. తల్లిదండ్రులు తమ పిల్లల ఫోన్లను ఉపయోగించనివ్వడం వల్ల పిల్లలే తల్లిదండ్రుల తరఫున గ్రూపుల్లో స్పందించిన సందర్భాలు కూడా ఉన్నాయని చెప్పారు. అందువల్ల తల్లిదండ్రులు తాము ఏం పోస్ట్ చేస్తున్నారో జాగ్రత్తగా ఉండాలని సూచించారు. వాట్సాప్ గ్రూపుల్లో వ్యక్తిగత, రెచ్చగొట్టే, వివాదాస్పద లేదా అగౌరవపరిచే వ్యాఖ్యలు చేయకూడదని స్పష్టం చేశారు.

టీచర్లకు అధికారిక SIMలు

Woodlem ఎడ్యుకేషన్ కూడా వాట్సాప్ కమ్యూనికేషన్‌ను అధికారికంగా, క్రమబద్ధంగా నిర్వహిస్తోందని ఆ సంస్థ ఫౌండర్, మేనేజింగ్ డైరెక్టర్ నౌఫల్ అహ్మద్ తెలిపారు. ఉపాధ్యాయులు, తల్లిదండ్రుల మధ్య మొదటి స్థాయి కమ్యూనికేషన్‌కు వాట్సాప్ గ్రూపులు ఉపయోగకరంగా ఉంటాయని తెలిపారు. ఉపాధ్యాయులకు అధికారిక SIM కార్డులు అందిస్తున్నామని, దీంతో కమ్యూనికేషన్ స్కూల్ పరిధిలోనే ప్రొఫెషనల్‌గా కొనసాగుతుందని చెప్పారు. స్కూల్ వాట్సాప్ గ్రూపులను ప్రధానంగా ప్రకటనలు, రిమైండర్లు, అకడమిక్ అప్‌డేట్లు, ముఖ్యమైన సమాచారం కోసం ఉపయోగిస్తున్నట్లు తెలిపారు.

సమస్యలపై గ్రూపుల్లో చర్చ వద్దు

ప్రతి విద్యా సంవత్సరం ప్రారంభంలో తల్లిదండ్రులకు వాట్సాప్ గ్రూప్ పాలసీని అందజేసి, దాన్ని అంగీకరించమని కోరుతున్నట్లు అహ్మద్ తెలిపారు. ఉపాధ్యాయులు, విద్యార్థులు, మార్కులు, హోంవర్క్ లేదా స్కూల్ పాలసీలపై సమస్యలు ఉంటే వాటిని వాట్సాప్ గ్రూపుల్లో బహిరంగంగా చర్చించకూడదని సూచించారు. అలాంటి ఫిర్యాదులను సంబంధిత Head of Section ద్వారా అధికారికంగా పరిష్కరించుకునే విధానం ఉందని తెలిపారు. సమస్యలను గోప్యంగా పరిశీలించి, అవసరమైనప్పుడు తల్లిదండ్రులను సంప్రదిస్తామని చెప్పారు.

తల్లిదండ్రులకు ఉపయోగం.. అదే సమయంలో ఒత్తిడి

కొన్నేళ్లుగా స్కూల్ వాట్సాప్ గ్రూపుల్లో ఉన్న తల్లిదండ్రులకు ఈ గ్రూపులు ఉపయోగకరంగానే కాకుండా కొన్నిసార్లు ఇబ్బందికరంగా కూడా మారుతున్నాయి. ఇద్దరు సీనియర్ స్కూల్ విద్యార్థుల తల్లి నజీలా అబ్దుల్లా మాట్లాడుతూ.. తల్లిదండ్రులు ఒకరికొకరు సహాయం చేసుకోవడం నుంచి వాదనలు, అనవసరమైన చర్చల వరకు ఎన్నో సందర్భాలు చూశానని తెలిపారు. సరైన విధంగా ఉపయోగిస్తే వాట్సాప్ గ్రూపులు తల్లిదండ్రులకు మంచి సహాయక వ్యవస్థగా ఉంటాయని, కానీ వ్యక్తిగత సమస్యలను గ్రూపుల్లోకి తీసుకువస్తే పరిస్థితి త్వరగా అదుపు తప్పుతుందని చెప్పారు. వివాదాలు వస్తే వాటిని గ్రూపులో కాకుండా వ్యక్తిగతంగా పరిష్కరించుకోవడం మంచిదని సూచించారు.

రాత్రివేళ మెసేజ్‌లపై ఆందోళన

మరో పేరెంట్ నోరా జాబెర్ మాట్లాడుతూ.. వాట్సాప్ సమస్య కాదని, దాన్ని ఎప్పుడు, ఎలా ఉపయోగిస్తున్నారనేదే అసలు సమస్య అని అన్నారు. స్కూల్ రిమైండర్లు, అప్‌డేట్లు, అత్యవసర సమాచారం వెంటనే తెలుసుకోవడానికి వాట్సాప్ చాలా ఉపయోగకరంగా ఉంటుందని చెప్పారు. అయితే రాత్రి ఆలస్యంగా కూడా వరుసగా మెసేజ్‌లు వస్తే తల్లిదండ్రులకు ఒత్తిడి పెరుగుతుందని పేర్కొన్నారు. కాబట్టి, స్కూల్ వాట్సాప్ గ్రూపులకు స్పష్టమైన సమయ పరిమితులు, ప్రవర్తనా నియమాలు ఉంటే అవి నిజంగా ఉపయోగకరమైన కమ్యూనికేషన్ సాధనంగా ఉంటాయని, లేకపోతే స్కూల్-ఇంటి మధ్య ఉన్న వ్యక్తిగత సమయానికి కూడా ఇబ్బంది కలిగించే అవకాశం ఉంటుందని తెలిపారు.