రియాద్: సౌదీ అరేబియా రోడ్లపై ట్రక్కులు, భారీ వాహనాల రాకపోకలకు సంబంధించి జనరల్ డైరెక్టరేట్ ఆఫ్ ట్రాఫిక్ కీలక నిబంధనలను ప్రకటించింది. భారీ ట్రక్కులు, హెవీ ఎక్విప్‌మెంట్ డ్రైవర్లు రోడ్లపై ప్రయాణించే సమయంలో తప్పనిసరిగా 6 నిబంధనలు పాటించాలని సూచించింది.

1. కుడివైపు లేన్‌లోనే ప్రయాణించాలి: మల్టీ లేన్ల రహదారులపై ట్రక్కు డ్రైవర్లు వీలైనంతగా కుడివైపు చివరి లేన్‌ను ఉపయోగించాలి.

2. నగరాల్లో ఎంట్రీ/ఎగ్జిట్ సమయాలు పాటించాలి: నగరాల్లోకి ట్రక్కులు ప్రవేశించడానికి లేదా నగరాల నుంచి బయటకు వెళ్లడానికి అధికారులు అనుమతించిన సమయాలను తప్పనిసరిగా పాటించాలి.

3. సరుకును సురక్షితంగా కప్పి, బిగించాలి: ట్రక్కుల్లో రవాణా చేసే సరుకును పూర్తిగా కప్పి, బలంగా బిగించాలి. ప్రయాణ సమయంలో సరుకు కింద పడకుండా జాగ్రత్తలు తీసుకోవాలి.

4. ట్రక్కుల్లో ప్రయాణికులను ఎక్కించకూడదు: ప్రయాణికుల రవాణా కోసం ప్రత్యేకంగా రూపొందించని ట్రక్కుల్లో వ్యక్తులను ఎక్కించుకుని ప్రయాణించడం నిషేధం.

5. రాత్రివేళ ట్రక్కు ఆగితే హెచ్చరిక గుర్తు పెట్టాలి: రాత్రి సమయంలో ట్రక్కు రోడ్డుపై ఆగిపోయినప్పుడు, దాని వెనుక తగినంత దూరంలో త్రిభుజాకార హెచ్చరిక గుర్తు లేదా రిఫ్లెక్టర్ ఏర్పాటు చేయాలి.

6. సరుకు పరిమాణం, బరువు పరిమితులు పాటించాలి:  రవాణా చేసే సరుకు అనుమతించిన పరిమాణం, బరువు పరిమితుల్లోనే ఉండాలి. నిబంధనలు ఉల్లంఘిస్తే ట్రాఫిక్ ఉల్లంఘనలతో పాటు ప్రమాదాలకు కూడా దారితీసే అవకాశం ఉంది.

ట్రక్కు డ్రైవర్లు ట్రాఫిక్ నిబంధనలు, అధికారుల సూచనలను పాటించడం రహదారి భద్రతను పెంచడంలో కీలకమని జనరల్ డైరెక్టరేట్ ఆఫ్ ట్రాఫిక్ పేర్కొంది. ట్రక్కుల రాకపోకల వల్ల ఏర్పడే ప్రమాదాలను తగ్గించడంలో ఈ నిబంధనలు మొదటి రక్షణ చర్యగా పనిచేస్తాయని, ట్రాఫిక్ క్రమశిక్షణను పెంచడంతో పాటు రోడ్లపై ప్రజల భద్రతను మెరుగుపరచడంలో ఇవి సహాయపడతాయని అధికారులు తెలిపారు.