దుబాయ్: యూఏఈలో ప్రతి ఏడాది నిర్వహించే ఇన్‌ఫ్లుయెంజా అవగాహన కార్యక్రమాన్ని ఈసారి మరింత విస్తరించారు. ఇప్పటివరకు ప్రధానంగా సీజనల్ ఫ్లూపైనే దృష్టి పెట్టగా.. 2026–27 అవగాహన క్యాంపెయిన్‌లో RSV (Respiratory Syncytial Virus), న్యూమోనియా వంటి ఇతర శ్వాసకోశ వ్యాధులను కూడా చేర్చారు.

చల్లని వాతావరణం ప్రారంభమయ్యే సమయంలో వివిధ రకాల శ్వాసకోశ ఇన్ఫెక్షన్లు వ్యాప్తి చెందే అవకాశం ఉండటంతో.. వాటి లక్షణాలు, వ్యాప్తి విధానం, ప్రమాదకర వర్గాలు, అందుబాటులో ఉన్న నివారణ చర్యలపై ప్రజలకు అవగాహన కల్పించడం ఈ క్యాంపెయిన్‌ ప్రధాన ఉద్దేశమని అధికారులు తెలిపారు.

ప్రస్తుతం వ్యాధుల పెరుగుదల ఉందా?

యూఏఈలో ప్రస్తుతం శ్వాసకోశ వ్యాధుల కార్యకలాపాలు అకస్మాత్తుగా పెరగలేదని ఆరోగ్య అధికారులు తెలిపారు. అబుదాబి డిపార్ట్‌మెంట్ ఆఫ్ హెల్త్‌లో సర్వైలెన్స్ అండ్ అవుట్‌బ్రేక్ రెస్పాన్స్ డైరెక్టర్ డాక్టర్ మహ్రా అల్‌హోసానీ ప్రకారం.. ఇప్పటివరకు పరిస్థితి గత రెండు సీజన్లతో పోలిస్తే దాదాపు సమానంగానే ఉంది. అందువల్ల ఈసారి క్యాంపెయిన్ విస్తరణకు కారణం వ్యాధులలో అకస్మాత్తు పెరుగుదల కాదని, ముందస్తు జాగ్రత్తలు మరియు ప్రజల్లో అవగాహన పెంచే విస్తృత చర్యల్లో భాగమని అధికారులు తెలిపారు.

సెప్టెంబర్ నుంచి మార్చి వరకు జాగ్రత్త

సీజనల్ శ్వాసకోశ వ్యాధులు సాధారణంగా సెప్టెంబర్ నుంచి మార్చి వరకు ఎక్కువగా కనిపించే అవకాశం ఉందని ఆరోగ్య అధికారులు తెలిపారు. ఈ కాలంలో ఒకేసారి పలు రకాల వైరస్‌లు వ్యాప్తి చెందవచ్చు.

ఈసారి ప్రధానంగా ఏ వ్యాధులపై దృష్టి?

సీజనల్ ఇన్‌ఫ్లుయెంజా (ఫ్లూ), RSV, న్యూమోనియా.
RSV సాధారణంగా జలుబు తరహా స్వల్ప లక్షణాలకు కారణమవుతుంది. అయితే చిన్నపిల్లలు, వృద్ధులు వంటి కొన్ని వర్గాల్లో ఇది తీవ్రమైన శ్వాసకోశ సమస్యలకు దారితీసే అవకాశం ఉంది.

ఎవరికి ఎక్కువ ప్రమాదం?

శ్వాసకోశ ఇన్ఫెక్షన్ల వల్ల సమస్యలు తలెత్తే అవకాశం ఉంది. చిన్నపిల్లలు, వృద్ధులు, గర్భిణులు,దీర్ఘకాలిక అనారోగ్య సమస్యలు ఉన్నవారు, రోగనిరోధక శక్తి బలహీనంగా ఉన్నవారికి ప్రమాదం అధికంగా ఉంటుందని డాక్టర్ తెలిపారు.

RSV నుంచి రక్షణ ఎలా?

దుబాయ్‌లో ఇటీవల యూఏఈ ఆరోగ్య మరియు నివారణ మంత్రిత్వ శాఖ (MoHAP) నిర్వహించిన కార్యక్రమంలో RSV నివారణకు అందుబాటులో ఉన్న పలు మార్గాలను వివరించారు. గర్భిణులకు వ్యాక్సిన్‌ను 28వ వారం గర్భధారణ నుంచి ఇవ్వవచ్చని అధికారులు తెలిపారు. తల్లి నుంచి రక్షణ పొందని శిశువులకు మోనోక్లోనల్ యాంటీబాడీలను మరో నివారణ మార్గంగా ఉపయోగించవచ్చు. అర్హత కలిగిన వృద్ధులకు RSV వ్యాక్సిన్లు కూడా అందుబాటులో ఉన్నాయని తెలిపారు.

తీసుకోవాల్సిన సాధారణ జాగ్రత్తలు

శ్వాసకోశ ఇన్ఫెక్షన్ల వ్యాప్తిని తగ్గించేందుకు ఆరోగ్య అధికారులు కొన్ని సాధారణ చర్యలను సూచించారు. చేతులను తరచూ శుభ్రంగా కడుక్కోవడం, దగ్గు లేదా తుమ్ము సమయంలో నోరు, ముక్కును కప్పుకోవడం, అనారోగ్యంగా ఉన్నప్పుడు ఇంట్లోనే ఉండడం, తరచూ తాకే ఉపరితలాలను శుభ్రంగా ఉంచడం వంటి చర్యలు పాటించాలని సూచించారు.