గాజా సిటీలో బుధవారం తెల్లవారుజామున ఘోర ప్రమాదం చోటుచేసుకుంది. ఓ భవనం అకస్మాత్తుగా కూలిపోవడంతో 16 మంది ప్రాణాలు కోల్పోయారు. మృతుల్లో 12 మంది మహిళలు, చిన్నారులు ఉన్నట్లు గాజా ఆరోగ్య శాఖ ప్రతినిధి జాహెర్ అల్ వహీది తెలిపారు.

ఇజ్రాయెల్ దాడులతో భవనం దెబ్బతిన్నది

కూలిపోయిన భవనం ఇప్పటికే ఇజ్రాయెల్ దాడుల కారణంగా తీవ్రంగా దెబ్బతిన్నట్లు సమాచారం. ఈ భవనంలో మొత్తం ఆరు కుటుంబాలు నివసిస్తున్నట్లు పౌర రక్షణ సిబ్బంది వెల్లడించారు.

ప్రత్యామ్నాయాలు లేక అక్కడే నివాసం

భవనం దెబ్బతిన్నప్పటికీ, సురక్షిత ప్రాంతాలకు తరలిపోవడానికి సరైన ప్రత్యామ్నాయాలు లేకపోవడంతో కుటుంబాలు అక్కడే ఉండాల్సి వచ్చిందని అధికారులు తెలిపారు. ఈ పరిస్థితుల్లోనే భవనం కూలిపోవడంతో భారీ ప్రాణనష్టం సంభవించింది. భవనం కూలిన అనంతరం సహాయక బృందాలు ఘటనాస్థలంలో సహాయక చర్యలు చేపట్టాయి. శిథిలాలను తొలగిస్తూ ప్రాణాలతో ఉన్నవారి కోసం గాలింపు కొనసాగుతోంది. ఈ ఘటనతో స్థానికంగా తీవ్ర విషాదం నెలకొంది.