దుబాయ్: వేసవి విరామం అనంతరం దుబాయ్‌లోని ప్రముఖ వినోద కేంద్రం దుబాయ్ పార్క్స్ అండ్ రిసార్ట్స్ అక్టోబర్ 7, 2026న సందర్శకుల కోసం తిరిగి తెరుచుకోనుంది. అక్టోబర్ మిడ్-టర్మ్ సెలవులకు ముందు పార్కులు సందర్శకులను ఆహ్వానించనున్నాయి.

రీ-ఓపెనింగ్ అనంతరం మోషన్‌గేట్ దుబాయ్, రియల్ మాడ్రిడ్ వరల్డ్, లెగోలాండ్ దుబాయ్ రిసార్ట్, ది వరల్డ్ ఆఫ్ రివర్‌ల్యాండ్ సందర్శకులకు అందుబాటులో ఉంటాయి.

ది వరల్డ్ ఆఫ్ రివర్‌ల్యాండ్ ప్రవేశ టికెట్లు Dh25 నుంచి ప్రారంభం కానుండగా, మోషన్‌గేట్ దుబాయ్, రియల్ మాడ్రిడ్ వరల్డ్ టికెట్ల ధరలు Dh295 నుంచి ప్రారంభమవుతాయి.

ఈ సీజన్‌లో రివర్‌ల్యాండ్‌లో కొత్తగా బౌలింగ్, లాంబోర్ఘిని ఆటోమొబిలి రేసింగ్ సిమ్యులేటర్లు అందుబాటులోకి రానున్నాయి. గో-కార్టింగ్, ఆర్చరీ, యాక్స్ త్రోయింగ్, షూటింగ్ ఛాలెంజెస్, మినీ గోల్ఫ్ వంటి కార్యకలాపాలు కూడా సందర్శకులను ఆకట్టుకోనున్నాయి.

అదనంగా పెర్ప్లెక్స్ సిటీ, ది హిడెన్ చాంబర్ వంటి పజిల్ ఆధారిత ఆకర్షణలు, నియాన్ గెలాక్సీ, ఆర్కేడ్ గేమ్స్ వంటి ఇండోర్ వినోదాలు అందుబాటులో ఉంటాయి. రివర్‌ల్యాండ్‌లో ఫ్రెంచ్ విలేజ్, బోర్డ్‌వాక్, స్పోర్ట్స్ బులేవార్డ్, ది పెనిన్సులా ప్రాంతాల్లో రెస్టారెంట్లు, కేఫ్‌లు, బహిరంగ ప్రదేశాలతో పాటు పలు వినోద కార్యక్రమాలు ఉన్నాయి.

మోషన్‌గేట్ దుబాయ్
మోషన్‌గేట్ దుబాయ్లో డ్రీమ్‌వర్క్స్ యానిమేషన్, కొలంబియా పిక్చర్స్, లయన్స్‌గేట్ చిత్రాల ఆధారంగా రూపొందించిన 29 రైడ్స్, ఆకర్షణలు ఉన్నాయి.
మడగాస్కర్ మాడ్ పర్సూట్, హికప్-టూత్‌లెస్‌తో కూడిన డ్రాగన్ గ్లైడర్స్, ది హంగర్ గేమ్స్ క్యాపిటల్ బుల్లెట్ ట్రైన్ వంటి రైడ్స్ ప్రధాన ఆకర్షణలుగా ఉన్నాయి. ష్రెక్, కుంగ్ ఫూ పాండా, ది స్మర్ఫ్స్ ఆధారిత ఆకర్షణలతో పాటు క్యారెక్టర్ ఎన్‌కౌంటర్లు కూడా సందర్శకులకు అందుబాటులో ఉంటాయి.

రియల్ మాడ్రిడ్ వరల్డ్
ఫుట్‌బాల్ అభిమానులను ఆకట్టుకునే రియల్ మాడ్రిడ్ వరల్డ్లో క్లబ్‌కు సంబంధించిన 40కి పైగా ఆకర్షణలు, అనుభవాలు ఉన్నాయి. ఇందులో హాలా మాడ్రిడ్ కోస్టర్, స్టార్స్ ఫ్లయర్ ఉన్నాయి. స్టార్స్ ఫ్లయర్ ద్వారా సందర్శకులను పార్క్‌ నుంచి 460 అడుగుల ఎత్తు వరకు తీసుకెళ్తారు.

ది బెర్నాబ్యూ ఎక్స్‌పీరియన్స్ ద్వారా రియల్ మాడ్రిడ్ క్లబ్ చరిత్రను తెలుసుకోవచ్చు. లా ఫాబ్రికా ట్రైనింగ్ పిచ్లో ఫుట్‌బాల్ నైపుణ్యాలను పరీక్షించుకోవచ్చు. అలాగే మీట్ ది స్టార్స్ వంటి ఇతర అనుభవాలు కూడా ఉన్నాయి.

లెగోలాండ్ దుబాయ్ రిసార్ట్
కుటుంబాలు, ముఖ్యంగా చిన్నారులను దృష్టిలో ఉంచుకుని రూపొందించిన లెగోలాండ్ దుబాయ్ రిసార్ట్లో లెగోలాండ్ దుబాయ్ థీమ్ పార్క్, లెగోలాండ్ వాటర్ పార్క్, లెగోలాండ్ హోటల్ ఉన్నాయి.

లెగోలాండ్ థీమ్ పార్క్‌లో 40కి పైగా రైడ్స్, ఆకర్షణలు ఉండగా, బిల్డింగ్ యాక్టివిటీస్, ఇంటరాక్టివ్ ప్లే, మినిల్యాండ్ ప్రధాన ఆకర్షణలుగా ఉన్నాయి. లెగోలాండ్ వాటర్ పార్క్‌లో 20 వాటర్ స్లైడ్స్, ఇతర వాటర్ ఆకర్షణలు ఉన్నాయి.

దుబాయ్ పార్క్స్ అండ్ రిసార్ట్స్‌లో సందర్శకుల కోసం టి-రెక్స్ గ్లాంపింగ్, లెగోలాండ్ హోటల్, లాపిటా వంటి వసతి సౌకర్యాలు కూడా ఉన్నాయి.

అక్టోబర్ 7న తిరిగి ప్రారంభం కానున్న నేపథ్యంలో, అక్టోబర్ మిడ్-టర్మ్ సెలవుల్లో కుటుంబాలు, పర్యాటకులకు దుబాయ్ పార్క్స్ అండ్ రిసార్ట్స్ మరో ప్రధాన వినోద గమ్యస్థానంగా నిలవనుంది.