కువైట్: ఆధునిక, స్మార్ట్ టెక్నాలజీని వైద్య రంగంలో విస్తృతంగా వినియోగిస్తూ కువైట్ ఆరోగ్య వ్యవస్థ కీలక పురోగతి సాధిస్తోంది. ముఖ్యంగా రోబోటిక్ సర్జరీ, రిమోట్ సర్జరీ సేవలను విస్తరిస్తూ అధునాతన వైద్య సేవలను అందుబాటులోకి తీసుకువస్తోంది.

కువైట్ ఆరోగ్య మంత్రిత్వ శాఖ అండర్‌సెక్రటరీ షేక్ డాక్టర్ సల్మాన్ ఖలీఫా అల్ సబాహ్ కువైట్ న్యూస్ ఏజెన్సీ (కునా)తో మాట్లాడుతూ, శస్త్రచికిత్స సేవల అభివృద్ధికి వైద్య నైపుణ్యం, నాణ్యమైన పరికరాలు, భద్రతా ప్రమాణాలతో కూడిన జాతీయ సామర్థ్యాల అభివృద్ధి అవసరమని తెలిపారు.

వైద్య రంగంలో సాంకేతిక పురోగతిని కేవలం కొత్త టెక్నాలజీ అందుబాటులోకి రావడం ద్వారా కాకుండా, అది రోగుల ఆరోగ్యం, చికిత్స నాణ్యతకు ఎంతవరకు ఉపయోగపడుతుందనే అంశం ఆధారంగా అంచనా వేయాలని ఆయన పేర్కొన్నారు.

పలు ఆసుపత్రుల్లో రోబోటిక్ సర్జరీ

ప్రస్తుతం షేక్ జాబర్ అల్-అహ్మద్, ఫర్వానియా, న్యూ జహ్రా, చెస్ట్ డిసీజెస్, షేక్ సబాహ్ అల్-అహ్మద్ యూరాలజీ సెంటర్లలో రోబోటిక్ సర్జరీలు నిర్వహిస్తున్నారు.

షేక్ జాబర్ అల్-అహ్మద్ ఆసుపత్రిలో 2019లో రోబోటిక్ సర్జరీ కార్యక్రమం ప్రారంభమైంది. 2026 సెప్టెంబర్ 4 నాటికి అక్కడ 1,145 రోబోటిక్ శస్త్రచికిత్సలు నిర్వహించారు.

యూరాలజీ, బేరియాట్రిక్ సర్జరీ, అప్పర్ గ్యాస్ట్రోఇంటెస్టినల్ సర్జరీ, హెర్నియా రిపేర్, కొలొరెక్టల్, లివర్ సర్జరీ, గైనకాలజీ, ప్రసూతి మరియు చెవి-ముక్కు-గొంతు సంబంధిత శస్త్రచికిత్సలు ఇందులో ఉన్నాయి.

ఆసుపత్రిలోని ఆర్థోపెడిక్ విభాగం 2024 జనవరిలో రోబోట్ సహాయంతో శస్త్రచికిత్సలను ప్రారంభించింది. ఇప్పటివరకు 115కు పైగా కేసులు నిర్వహించారు.

న్యూ జహ్రా ఆసుపత్రిలో 2025 ఏప్రిల్ 27న తొలి రోబోటిక్ శస్త్రచికిత్స నిర్వహించారు. 2026 సెప్టెంబర్ 6 నాటికి మొత్తం 155 ఆపరేషన్లు పూర్తయ్యాయి. కార్యక్రమం ప్రారంభమైన ఆరు నెలల్లోనే 100 శస్త్రచికిత్సలు నిర్వహించడం వైద్య బృందాల అనుభవం, సమన్వయం పెరుగుతున్నదానికి నిదర్శనంగా అధికారులు పేర్కొన్నారు.

ఛాతీ, గుండె శస్త్రచికిత్సల్లోనూ వినియోగం

చెస్ట్ డిసీజెస్ ఆసుపత్రిలో థొరాసిక్, కార్డియాక్ సర్జరీల్లోనూ రోబోటిక్ టెక్నాలజీని వినియోగిస్తున్నారు. ఇప్పటివరకు 30 థొరాసిక్, 25 కార్డియాక్ శస్త్రచికిత్సలు నిర్వహించారు.

రోబోటిక్ సర్జరీ ద్వారా శరీరంలోని కణజాలాన్ని మరింత స్పష్టంగా చూడటం, శస్త్రచికిత్స పరికరాలపై మెరుగైన నియంత్రణ, ఖచ్చితత్వం సాధ్యమవుతుందని అల్ సబాహ్ తెలిపారు. తగిన కేసుల్లో తక్కువ ఇన్వేసివ్ విధానాల్లో చికిత్స అందించే అవకాశం కూడా ఉంటుందని చెప్పారు.

అయితే ఆసుపత్రిలో ఉండే సమయం, కోలుకునే వేగంపై రోబోటిక్ సర్జరీ ప్రభావాన్ని నిర్ధారించేందుకు ప్రతి శస్త్రచికిత్స, రోగి పరిస్థితిని ఇతర చికిత్సా విధానాలతో శాస్త్రీయంగా పోల్చి నిరంతరం అధ్యయనం చేయాల్సి ఉంటుందని ఆయన వివరించారు.

సరిహద్దులు దాటి రిమోట్ సర్జరీ

రోబోటిక్ సర్జరీతో పాటు కువైట్ రిమోట్ సర్జరీలోనూ అనుభవాన్ని పెంచుకుంటోంది. దేశంలో, విదేశాల్లో ఉన్న నిపుణుల వైద్య నైపుణ్యాన్ని అధునాతన కమ్యూనికేషన్ సాంకేతికత ద్వారా కువైట్‌లోని రోగులకు అందించే విధానాన్ని అభివృద్ధి చేస్తోంది.

షేక్ సబాహ్ అల్-అహ్మద్ యూరాలజీ సెంటర్లో 2024 డిసెంబర్ 20న రిమోట్ రోబోటిక్ సర్జరీ ప్రారంభమైంది. ఇప్పటివరకు 15 విజయవంతమైన రిమోట్ శస్త్రచికిత్సలు నిర్వహించారు. వీటిలో 12 అంతర్జాతీయ, మూడు దేశీయ ఆపరేషన్లు ఉన్నాయి.

అంతర్జాతీయ రిమోట్ శస్త్రచికిత్సల్లో చైనాలోని షాంఘై నుంచి 8, ఫ్రాన్స్‌లోని స్ట్రాస్‌బర్గ్ నుంచి 2, ఒమన్‌లోని మస్కట్ నుంచి 1, ఇటలీలోని పడువా నుంచి 1 ఆపరేషన్ నిర్వహించారు.

ఈ సమయంలో రోగులు కువైట్‌లోని వైద్య కేంద్రంలోనే ఉండగా, వారి పక్కనే ఉన్న స్థానిక వైద్య బృందం నేరుగా రోగి సంరక్షణను పర్యవేక్షించింది.

స్ట్రాస్‌బర్గ్ నుంచి కువైట్ రోగికి శస్త్రచికిత్స

2025 జూలైలో జరిగిన అంతర్జాతీయ సదస్సులో ప్రసారం చేసిన ఒక ప్రత్యేక కేసులో, స్ట్రాస్‌బర్గ్ నుంచి కువైట్‌కు చెందిన సర్జన్ రిమోట్‌గా కువైట్‌లోని రోగికి రాడికల్ ప్రోస్టేటెక్టమీ నిర్వహించారు.

ఈ విధానం ద్వారా కువైట్ వైద్య నిపుణుల సామర్థ్యాన్ని ప్రదర్శించడంతో పాటు రిమోట్ సర్జరీపై అంతర్జాతీయ స్థాయిలో వైద్య విజ్ఞాన మార్పిడికి అవకాశం ఏర్పడింది.

12,034 కిలోమీటర్ల దూరంలో రిమోట్ సర్జరీ

కువైట్-బ్రెజిల్ మధ్య జరిగిన మరో అంతర్జాతీయ వైద్య సహకారం కూడా ప్రత్యేక గుర్తింపు పొందింది. షేక్ జాబర్ అల్-అహ్మద్ ఆసుపత్రి మరియు బ్రెజిల్‌లోని స్కోలా సెంటర్, క్రూజ్ వెర్మెల్హా ఆసుపత్రి మధ్య జరిగిన సహకారంలో కువైట్ వైద్య బృందం బ్రెజిల్‌లోని రోగికి రిమోట్‌గా శస్త్రచికిత్స నిర్వహించింది.

12,034.92 కిలోమీటర్ల దూరంలో జరిగిన ఈ శస్త్రచికిత్సను 2025 సెప్టెంబర్ 23న గిన్నిస్ వరల్డ్ రికార్డ్స్ నమోదు చేసింది.

అదే సహకారంలో బ్రెజిల్ వైద్య బృందం కువైట్‌లోని ఒక రోగికి రిమోట్‌గా శస్త్రచికిత్స నిర్వహించింది. దీంతో సరిహద్దులు దాటి ఇరుదేశాల వైద్య బృందాల మధ్య పరస్పర రిమోట్ సర్జరీ సహకారం సాధ్యమైంది.

దేశీయంగా కూడా రిమోట్ ఆపరేషన్లు

కువైట్‌లోని వివిధ ఆసుపత్రుల మధ్య కూడా రిమోట్ సర్జరీ సేవలను వినియోగిస్తున్నారు. 2025 అక్టోబర్‌లో షేక్ జాబర్ అల్-అహ్మద్ ఆసుపత్రి గైనకాలజికల్ ఆంకాలజీ విభాగం, జహ్రా ఆసుపత్రి ప్రసూతి-గైనకాలజీ విభాగం కలిసి గర్భాశయ క్యాన్సర్ రోగులకు మూడు రిమోట్ శస్త్రచికిత్సలు నిర్వహించాయి.

2025 నవంబర్‌లో ఫర్వానియా ఆసుపత్రి సర్జరీ విభాగం, షేక్ సబాహ్ అల్-అహ్మద్ యూరాలజీ సెంటర్‌తో కలిసి మరో రిమోట్ ఆపరేషన్ నిర్వహించింది. రోగికి గాల్‌బ్లాడర్, ఎడమ కిడ్నీ తొలగించాల్సి ఉండగా, గాల్‌బ్లాడర్ శస్త్రచికిత్సను ఫర్వానియా ఆసుపత్రి నుంచి రిమోట్‌గా నిర్వహించారు. అనంతరం కిడ్నీ శస్త్రచికిత్సను యూరాలజీ సెంటర్ వైద్య బృందం పూర్తి చేసింది.

భద్రత, శిక్షణకు ప్రాధాన్యం

రిమోట్ సర్జరీలో అత్యవసర పరిస్థితులకు స్పష్టమైన ప్రణాళికలు, రోగి పక్కన అర్హత కలిగిన వైద్య సిబ్బంది, ప్రత్యామ్నాయ చికిత్సా విధానాలకు వెంటనే మారే సామర్థ్యం తప్పనిసరిగా ఉండాలని అల్ సబాహ్ స్పష్టం చేశారు.

రోబోటిక్, రిమోట్ సర్జరీ సేవలను మరింత అభివృద్ధి చేయాలంటే వైద్య సేవలు, డిజిటల్ మౌలిక వసతుల మధ్య సమన్వయం అవసరమని ఆయన తెలిపారు. విశ్వసనీయమైన ఇంటర్నెట్ కనెక్టివిటీ, డేటా రక్షణ, పరికరాల నిర్వహణ, వైద్య సిబ్బందికి నిరంతర శిక్షణ వంటి అంశాలకు ప్రాధాన్యం ఇవ్వాలని చెప్పారు.

సర్జన్లు, అనస్థీషియాలజిస్టులు, నర్సులు, టెక్నికల్ సిబ్బందికి సిమ్యులేషన్ ఆధారిత శిక్షణ, నైపుణ్యాల అంచనా, అంతర్జాతీయ స్థాయి జ్ఞాన మార్పిడిని కొనసాగించాల్సిన అవసరం ఉందన్నారు.

రోబోటిక్ సర్జరీ ఎంపికలో రోగి ప్రయోజనాలే ప్రధానంగా ఉండాలని, చికిత్స వల్ల కలిగే ప్రయోజనాలు, ప్రమాదాలు, ప్రత్యామ్నాయాలపై రోగులకు స్పష్టమైన సమాచారం అందించాలని సూచించారు.

జాతీయ వైద్య సిబ్బందిలో నైపుణ్యాలను పెంపొందిస్తూ, అంతర్జాతీయ ప్రమాణాలకు అనుగుణంగా శిక్షణ అందించడం ద్వారా కువైట్ అధునాతన వైద్య సేవలలో తన సామర్థ్యాన్ని మరింత బలోపేతం చేసుకోవాలని లక్ష్యంగా పెట్టుకున్నట్లు అల్ సబాహ్ తెలిపారు.

రోబోటిక్, రిమోట్ సర్జరీ సేవల విస్తరణ ద్వారా అధునాతన వైద్య సేవలకు ప్రాంతీయ కేంద్రంగా కువైట్‌ను మరింత అభివృద్ధి చేయాలనే లక్ష్యంతో ప్రభుత్వం ముందుకు సాగుతోంది.