మనామా: బహ్రెయిన్‌లో ప్రైవేట్ ఆసుపత్రులు, క్లినిక్‌లు నిబంధనలు ఉల్లంఘించినప్పుడు నేరుగా లైసెన్స్ సస్పెండ్ చేయకుండా ముందుగా హెచ్చరికలు జారీ చేయడం లేదా కొన్ని వైద్య సేవలను తాత్కాలికంగా నిలిపివేసేలా కొత్త ప్రతిపాదన తెరపైకి వచ్చింది. ఈ ప్రతిపాదనపై ఆదివారం షురా కౌన్సిల్‌లో చర్చించి ఓటింగ్ నిర్వహించనున్నారు.

ప్రస్తుతం అమల్లో ఉన్న 2015 నాటి ప్రైవేట్ హెల్త్‌కేర్ ప్రొవైడర్ల చట్టంలోని ఆర్టికల్ 23ను సవరించాలని ప్రతిపాదించారు. నిబంధనల ఉల్లంఘనలను నిర్ణీత గడువులో సరిదిద్దకపోతే ఆసుపత్రులు, క్లినిక్‌ల లైసెన్స్‌లను సస్పెండ్ చేయడం లేదా రద్దు చేసే అధికారం ప్రస్తుతం నియంత్రణ సంస్థలకు ఉంది. అయితే చిన్నపాటి ఉల్లంఘనలకు, తీవ్రమైన ఉల్లంఘనలకు మధ్య స్పష్టమైన తేడా లేకపోవడంతో చిన్న తప్పిదాలకూ లైసెన్స్ కోల్పోయే ప్రమాదం ఉందని నేషనల్ హెల్త్ రెగ్యులేటరీ అథారిటీ (NHRA) పేర్కొంది.

కొత్త సవరణ అమల్లోకి వస్తే చిన్నపాటి తప్పిదాలకు ముందుగా హెచ్చరికలు జారీ చేయవచ్చు. అవసరమైతే కొన్ని సేవలను పరిమిత కాలం పాటు నిలిపివేయవచ్చు. అయితే దీనివల్ల రోగులకు ఎలాంటి నష్టం కలగకూడదనే నిబంధన ఉంటుంది. ఉల్లంఘన తీవ్రతను బట్టి లైసెన్స్ సస్పెన్షన్ లేదా రద్దు చేసే అధికారం కూడా కొనసాగుతుంది.

అయితే, జరిమానాల్లో మాత్రం ఎలాంటి మార్పులు ఉండవు. మొదటి ఉల్లంఘనకు రోజుకు గరిష్ఠంగా BD1,000, మూడేళ్లలో మరోసారి ఉల్లంఘన జరిగితే రోజుకు BD2,000 వరకు జరిమానా విధించవచ్చు. వీటితోపాటు ప్రత్యేకంగా BD20,000 వరకు జరిమానా విధించే నిబంధన కూడా కొనసాగుతుంది. ఈ మార్పుల వల్ల ఉల్లంఘనలను సరిదిద్దుకునే సమయంలోనూ క్లినిక్‌లు రోగులకు వైద్య సేవలు కొనసాగించేందుకు అవకాశం ఉంటుందని బహ్రెయిన్ ఆరోగ్య మంత్రిత్వ శాఖ అభిప్రాయపడింది. అయితే రోగుల భద్రతకు స్పష్టమైన మార్గదర్శకాలు అవసరమని సూచించింది.

బహ్రెయిన్ ప్రైవేట్ హాస్పిటల్స్ అసోసియేషన్ ఛైర్మన్ డాక్టర్ అబ్దుల్‌వహాబ్ మొహమ్మద్ అబ్దుల్‌వహాబ్ కూడా ఈ ప్రతిపాదనకు మద్దతు తెలిపారు. చిన్నపాటి ఉల్లంఘనల కారణంగా వైద్య సేవలకు అనవసర అంతరాయం కలగకూడదని అసోసియేషన్ అభిప్రాయపడింది. షురా కౌన్సిల్ సభ్యులు డాక్టర్ ఇబ్తిసామ్ అల్ దల్లాల్, దలాల్ అల్ జాయెద్, డాక్టర్ జమీల అల్ సల్మాన్, డాక్టర్ అహ్మద్ అల్ ఒరైయెద్, డాక్టర్ హానీ అల్ సాతీ ఈ బిల్లును ప్రతిపాదించారు.