న్యూయార్క్: అమెరికా, ఇజ్రాయెల్‌తో కొనసాగుతున్న యుద్ధం నేపథ్యంలో ఇరాన్ అధ్యక్షుడు మసూద్ పెజెష్కియన్ ఐక్యరాజ్యసమితి సర్వసభ్య సమావేశంలో తీవ్ర స్వరంతో ప్రసంగించారు. అమెరికా అధ్యక్షుడు డొనాల్డ్ ట్రంప్ను ఉద్దేశించి ఇరాన్ ప్రజలు ఎప్పటికీ తలవంచబోరని, ఒత్తిళ్లకు లొంగరని ఆయన స్పష్టం చేశారు.

అమెరికా విధిస్తున్న ఆంక్షలు, పెరుగుతున్న ఒత్తిళ్లు, బెదిరింపులు ఇరాన్ ప్రజల ప్రతిఘటనను మరింత పెంచుతాయని పెజెష్కియన్ అన్నారు. “మేము ఎప్పటికీ తలవంచం.. మోకాళ్లపై వంగం” అని ఆయన వ్యాఖ్యానించారు.

యుద్ధం ప్రారంభంలో ఇరాన్ మాజీ సుప్రీం లీడర్ అయతుల్లా అలీ ఖమేనీ హత్యకు అమెరికానే కారణమని ఆరోపించిన పెజెష్కియన్.. వాషింగ్టన్ చర్యలను ‘టెర్రరిజం’గా అభివర్ణించారు. ప్రసంగం సందర్భంగా ఖమేనీ చిత్రాన్ని కూడా ఆయన ప్రదర్శించారు.

‘మేము ఉగ్రవాదులం కాదు’

అమెరికా, ఇజ్రాయెల్ దాడుల్లో ఇరాన్ ప్రజలు బాధితులుగా మారారని పెజెష్కియన్ ఆరోపించారు. యుద్ధం ప్రారంభ రోజుల్లో మరణించిన 150 మందికి పైగా ఇరాన్ పాఠశాల విద్యార్థుల చిత్రాలను కూడా ఆయన ఐరాస వేదికపై ప్రదర్శించారు.

ఇరాన్ ఎప్పుడూ యుద్ధాన్ని ప్రారంభించలేదని, తమ దేశంపై జరిగిన దాడులను ఎదుర్కొనేందుకే ప్రతిఘటించామని ఆయన పేర్కొన్నారు. తమ దేశంపై అమెరికా, ఇజ్రాయెల్ దాడి చేశాయని ఆరోపిస్తూ.. “మేము మమ్మల్ని మేము రక్షించుకున్నాం. మేము ఉగ్రవాదులం కాదు” అని అన్నారు.

హార్ముజ్ జలసంధి పై కీలక వ్యాఖ్యలు

హార్ముజ్ జలసంధిని తమ దేశంపై దాడులకు ఉపయోగించేందుకు అనుమతించబోమని పెజెష్కియన్ స్పష్టం చేశారు. ఈ జలమార్గం ద్వారా ఇతర దేశాలు తమ ప్రయోజనాలను కొనసాగిస్తూ, అదే మార్గాన్ని ఇరాన్‌పై ఒత్తిడి లేదా దాడులకు ఉపయోగించడాన్ని అంగీకరించబోమన్నారు.

ఇదిలా ఉండగా, ఇరాన్‌పై సైనిక చర్యలను మరింత తీవ్రతరం చేసే అంశాన్ని పరిశీలిస్తున్నట్లు అమెరికా అధ్యక్షుడు డొనాల్డ్ ట్రంప్ మంగళవారం ఐరాసలో వ్యాఖ్యానించారు. అదే సమయంలో ఇరాన్, అమెరికా ప్రతినిధుల మధ్య తిరిగి చర్చలు ప్రారంభం కావడాన్ని కూడా ఆయన ప్రస్తావించారు. అయితే పెజెష్కియన్ తన ప్రసంగంలో ఈ చర్చలపై ప్రత్యేకంగా ప్రస్తావించలేదు.

అమెరికా నుంచి వీసా మంజూరు విషయంలో అనిశ్చితి నెలకొన్నప్పటికీ చివరకు పెజెష్కియన్ ఐరాస సమావేశానికి హాజరయ్యారు. అయితే ఆయన బృందంలోని పలువురు సభ్యులకు అమెరికా వీసాలు నిరాకరించింది.