ఇరాక్‌లోని కిర్కుక్ పట్టణంలో బెల్టు బాంబు పేల్చుకోవడానికి సిద్ధమైన బాలుణ్ని పోలీసులు అడ్డుకున్న దృశ్యాలు స్థానిక టీవీ చానెళ్లలో ప్రసారమయ్యాయి. ఇద్దరు పోలీసులు అతణ్ని గట్టిగా పట్టుకోగా ఒకరు బెల్టు బాంబును తొలగించారు. తరువాత బాలుణ్ని పోలీసు ట్రక్కులో ఎక్కించుకుని అక్కడి నుంచి తీసుకెళ్లారు. పోలీసులు సకాలంలో అతడిని గుర్తించడంతో పెద్ద ముప్పు తప్పింది. బాలుడి వయస్సు కచ్చితంగా వెల్లడించలేదు. తీవ్రవాదులు బాలుడిని కిడ్నాప్ చేసి మానవ బాంబుగా తయారుచేసినట్టు కిర్కుక్ పోలీసులు వెల్లడించారు. ఆత్మాహుతి దాడి చేసేందుకు అతడిపై తీవ్రవాదులు ఒత్తిడి తెచ్చారని తెలిపారు.స్థానిక మసీదుపై ఆత్మాహుతి దాడి జరిగిన కొద్దిసేపటికే బాలుడు పట్టుబడడం గమనార్హం.