మస్కట్: ఒమన్‌లో అక్టోబర్ 1 నుంచి 1,546 రకాల వస్తువులను జీరో వ్యాట్ (VAT) జాబితాలో చేర్చారు. ఇందులో 807 ఆహార పదార్థాలు, 677 వైద్య సంబంధిత వస్తువులు, 62 వెటర్నరీ ఉత్పత్తులు ఉన్నాయి. ఈ వస్తువులపై విలువ ఆధారిత పన్ను (VAT) విధించరు. సమాజ అవసరాలను దృష్టిలో ఉంచుకుని పన్ను వ్యవస్థను మరింత అభివృద్ధి చేయడంలో భాగంగానే ఈ నిర్ణయం తీసుకున్నట్లు ఒమన్ పన్ను అధికారులు తెలిపారు. ప్రజలకు మరింత సౌకర్యవంతంగా, సమర్థవంతంగా సేవలు అందించేందుకు ఇది ఒక ముందడుగు అని పేర్కొన్నారు. ఒమన్ 2021లో జీరో వ్యాట్ విధానాన్ని ప్రవేశపెట్టింది.

కొత్తగా జీరో వ్యాట్ వర్తించే ఆహార పదార్థాల్లో మాంసం, పౌల్ట్రీ, పాలు, పాల ఉత్పత్తులు, చీజ్, కూరగాయలు, పండ్లు, చేపలు, రొయ్యలు, స్క్విడ్, గుడ్లు ఉన్నాయి. వీటితో పాటు ధాన్యాలు, పప్పులు, పిండి, బ్రెడ్, ఎంపిక చేసిన ఆహార ఉత్పత్తులు, నీరు, పశువుల మేత, ఆహార ఉత్పత్తికి సంబంధించిన కొన్ని వస్తువులు కూడా జాబితాలో ఉన్నాయి.
వైద్య విభాగంలో మందులు, ఫార్మాస్యూటికల్ తయారీ ఉత్పత్తులు, ప్రత్యేక వైద్య అవసరాల కోసం ఉపయోగించే ఆహార పదార్థాలు, బయోలాజికల్ ఉత్పత్తులు, విటమిన్లు, హార్మోన్లు, కొన్ని చికిత్సా ఉత్పత్తులు, యాంటీబయాటిక్స్, యాంటీమైక్రోబియల్స్‌తో పాటు వైద్య, శస్త్రచికిత్స పరికరాలు, సరఫరాలను జీరో వ్యాట్ జాబితాలో చేర్చారు.

పశువైద్య రంగంలో ఉపయోగించే వ్యాక్సిన్లు, ఇమ్యూనోలాజికల్ ఉత్పత్తులు, యాంటీబయాటిక్స్, వెటర్నరీ మందులు, విటమిన్లు, అమినో యాసిడ్లు, హార్మోన్లు, చికిత్సా ఉత్పత్తులు, వైద్య ద్రావణాలు, ఇతర వెటర్నరీ కేర్ సామగ్రికి కూడా జీరో వ్యాట్ వర్తించనుంది. అక్టోబర్ 1 నుంచి అమల్లోకి వచ్చే ఈ మార్పుతో నిత్యావసర ఆహారం, వైద్య అవసరాలు, పశువైద్య ఉత్పత్తులకు సంబంధించిన విస్తృత శ్రేణి వస్తువులపై VAT భారం ఉండదని ప్రకటించారు.