ఆర్టిఫిషియల్ ఇంటెలిజెన్స్ (ఏఐ) టెక్నాలజీని తప్పుదోవ పట్టిస్తూ, ప్రముఖ సినిమాల్లోని పాటలను మార్ఫింగ్ చేసి అసభ్యకరమైన వీడియోలను సృష్టించడంపై టాలీవుడ్ మెగాస్టార్ చిరంజీవి తీవ్ర దిగ్భ్రాంతి వ్యక్తం చేశారు. ఇటీవల ‘చుట్టమల్లే’ పాటను ఏఐ ద్వారా మార్ఫింగ్ చేసి సామాజిక మాధ్యమాలలో వైరల్ చేస్తున్న ఘటనలపై ఆయన తీవ్రంగా స్పందించారు. ఇలాంటి చర్యలు అత్యంత క్రూరమైనవని, సిగ్గుచేటైనవని మరియు సమాజంలో ఏమాత్రం ఆమోదయోగ్యం కానివని ఆయన కుండబద్దలు కొట్టారు. ఇది కేవలం ఒక వ్యక్తికి లేదా ఒక సినిమాకు మాత్రమే సంబంధించిన సమస్య కాదని, యావత్ సమాజం దీనిపై సమిష్టిగా పోరాడాల్సిన అవసరం ఉందని పిలుపునిచ్చారు.

మౌనంగా ఉండాల్సిన సమయం కాదు: చిరంజీవి హెచ్చరిక

ఈ అంశంపై చిరంజీవి సోషల్ మీడియా వేదికగా ఒక సుదీర్ఘ లేఖను విడుదల చేస్తూ ప్రజలను అప్రమత్తం చేశారు. “ఈ రోజు ఇది మరొకరికి జరిగింది, రేపు మీకు, నాకు లేదా మనకు తెలిసిన ఎవరికైనా జరగవచ్చు. మనకు వ్యక్తిగతంగా రాలేదు కదా అని ఎవరూ మౌనంగా ఉండలేం” అని ఆయన పేర్కొన్నారు. ఏఐ దుర్వినియోగానికి వ్యతిరేకంగా ప్రతి ఒక్కరూ గళం విప్పాలని పిలుపునిచ్చారు. ఇలాంటి మార్ఫింగ్ కంటెంట్‌ను సృష్టించే వారిని, అలాగే వాటిని ఉద్దేశపూర్వకంగా ప్రచారం చేసేవారిని చట్టపరంగా కఠినంగా శిక్షించాలని ఆయన డిమాండ్ చేశారు. దీన్ని ఎవరూ కేవలం ఒక సాధారణ జోక్‌గా కొట్టిపారేయవద్దని హితవు పలికారు.

సినీ పరిశ్రమ తరఫున ప్రత్యేక కమిటీ, సపోర్ట్ సెల్ ఏర్పాటు

ఈ సామాజిక దుర్గానికి అడ్డుకట్ట వేసేందుకు తాను స్వయంగా రంగంలోకి దిగుతున్నట్లు చిరంజీవి వెల్లడించారు. త్వరలోనే తెలుగు ఫిల్మ్ ఛాంబర్, నిర్మాతల మండలి మరియు ఇతర అనుబంధ సంఘాల పెద్దలతో సమావేశం కానున్నట్లు తెలిపారు. బాధితులకు తక్షణ మద్దతు అందించేందుకు, సైబర్ క్రైమ్ అధికారులతో సమన్వయం చేసుకుంటూ పనిచేసేందుకు ఒక ప్రత్యేక కమిటీ మరియు సపోర్ట్ సెల్‌ను ఏర్పాటు చేయాలని సూచించనున్నట్లు వెల్లడించారు. ఈ బృందం బాధితులకు అండగా నిలవడం, ఆన్‌లైన్ వేదికల నుంచి అసభ్యకర కంటెంట్‌ను తొలగించడం, నిందితులపై చట్టరీత్యా చర్యలు తీసుకునేలా చూడటం వంటి కీలక బాధ్యతలు నిర్వర్తిస్తుందని తెలిపారు. ఈ పోరాటంలో చిత్ర పరిశ్రమలోని అందరూ భాగస్వాములు కావాలని కోరారు.

ప్రభుత్వాలకు విజ్ఞప్తి.. సోషల్ మీడియా వినియోగదారులకు హెచ్చరిక

ఏఐ సాంకేతికత దుర్వినియోగాన్ని అరికట్టేందుకు మరింత కఠినమైన చట్టాలు, సమర్థవంతమైన నిబంధనలను తీసుకురావాలని కేంద్ర, రాష్ట్ర ప్రభుత్వాలను చిరంజీవి కోరారు. ఈ పోస్టులో ఆయన తెలంగాణ, ఆంధ్రప్రదేశ్ ముఖ్యమంత్రులు రేవంత్ రెడ్డి, చంద్రబాబు నాయుడుతో పాటు కేంద్ర హోం మంత్రి అమిత్ షా, ఐటీ శాఖ మంత్రి అశ్విని వైష్ణవ్‌లను ట్యాగ్ చేశారు. ప్రజలందరికీ విజ్ఞప్తి చేస్తూ.. ఎవరూ కూడా ఖండించే ఉద్దేశంతో కూడా ఇలాంటి వీడియోలను చూడవద్దని, డౌన్‌లోడ్ చేయవద్దని, సర్క్యులేట్ చేయవద్దని హెచ్చరించారు. ఎక్కడైనా ఇలాంటివి కనిపిస్తే వెంటనే సంబంధిత సోషల్ మీడియా ప్లాట్‌ఫామ్‌లకు, సైబర్ క్రైమ్ అధికారులకు రిపోర్ట్ చేయాలని కోరారు. “మానవ గౌరవాన్ని కాపాడుకోవడం మన అందరి సమష్టి బాధ్యత” అని పేర్కొంటూ #UniteAgainstDigitalAbuse అనే హ్యాష్‌ట్యాగ్‌తో ఉద్యమ స్ఫూర్తిని చాటారు.