మస్కట్: ఒమన్‌లోని రాయల్ ఆసుపత్రి హార్ట్ సెంటర్ వైద్య రంగంలో కీలక ముందడుగు వేసింది. తొలిసారిగా అత్యాధునిక  ఇంపెల్లా సీపీ స్మార్ట్ అసిస్ట్ (Impella CP with Smart-Assist) పరికరాన్ని ఉపయోగించి సంక్లిష్టమైన కార్డియాక్ క్యాథెటరైజేషన్ ప్రక్రియను విజయవంతంగా నిర్వహించింది. నైపుణ్యం కలిగిన ఒమానీ వైద్య బృందం ఈ చికిత్సను చేపట్టగా, ప్రత్యేక శిక్షణ పొందిన నర్సింగ్, సాంకేతిక సిబ్బంది సహకారం అందించారు.

గుండె పనితీరుకు తాత్కాలికంగా మద్దతు
జాతీయ గుండె కేంద్రంలోని కార్డియాక్ క్యాథెటరైజేషన్ విభాగాధిపతి డాక్టర్ ఆదిల్ అల్ జబ్రీ మాట్లాడుతూ..ఇంపెల్లా సీపీ స్మార్ట్ అసిస్ట్ పరికరం ప్రపంచవ్యాప్తంగా అందుబాటులో ఉన్న అత్యాధునిక వైద్య సాంకేతికతల్లో ఒకటని తెలిపారు. ఈ పరికరం చిన్న పంపు (మైక్రో పంప్) తరహాలో పనిచేస్తుందని, క్యాథెటర్ ద్వారా శరీరంలోకి ప్రవేశపెట్టి గుండె కండరాలకు తాత్కాలికంగా మద్దతు అందిస్తుందని వివరించారు. గుండె శరీరంలోని ఇతర భాగాలకు రక్తాన్ని సమర్థంగా పంపింగ్ చేయడానికి ఇది సహాయపడుతుందని పేర్కొన్నారు.

గుండె షాక్‌ పరిస్థితుల్లో మెరుగైన చికిత్సకు అవకాశం
ఇటీవలి అధ్యయనాలు ఈ సాంకేతికత రక్త ప్రసరణకు మద్దతు ఇవ్వడంలో, నిర్దిష్ట రోగుల ప్రాణాలు నిలిచే అవకాశాలను మెరుగుపరచడంలో ఉపయోగకరంగా ఉన్నట్లు సూచిస్తున్నాయని డాక్టర్ ఆదిల్ తెలిపారు. ముఖ్యంగా గుండె అకస్మాత్తుగా రక్తాన్ని సమర్థంగా పంప్ చేయలేని కార్డియోజెనిక్ షాక్‌ పరిస్థితుల్లో, అధునాతన చికిత్సా విధానాలను అందించేందుకు ఈ పరికరం మరిన్ని అవకాశాలను కల్పిస్తుందని వివరించారు.
ఒమన్ వైద్య రంగంలో కీలక ముందడుగు

నేషనల్ హార్ట్ సెంటర్ డైరెక్టర్ డాక్టర్ నజీబ్ జహ్రాన్ అల్ రవాహి మాట్లాడుతూ.. ఈ సాంకేతికతను చికిత్సా విధానాల్లో ప్రవేశపెట్టడం గుండె సంబంధిత వైద్య సేవల అభివృద్ధిలో కీలక మైలురాయని పేర్కొన్నారు. ప్రపంచవ్యాప్తంగా అందుబాటులోకి వస్తున్న ఆధునిక వైద్య విధానాలు, సాంకేతికతలను అందిపుచ్చుకోవడంలో వైద్య, సాంకేతిక బృందాల నిబద్ధతకు ఇది నిదర్శనమని తెలిపారు. ఈ విజయంతో ఒమన్ ఆరోగ్య రంగంలో కొనసాగుతున్న ఆధునికీకరణ మరోసారి స్పష్టమైందని, ప్రపంచస్థాయి చికిత్సా సాంకేతికతలను దేశంలో అందుబాటులోకి తీసుకురావడానికి రాయల్ ఆసుపత్రి కృషి చేస్తోందని వెల్లడించారు.