రియాద్: రియాద్‌లోని కింగ్ ఖాలిద్ అంతర్జాతీయ విమానాశ్రయంపై అక్టోబర్ 11న జరిగిన దాడిలో ఓ పాకిస్థానీ వ్యక్తి మరణించగా, మరో 11 మంది గాయపడినట్లు సౌదీ అరేబియా జనరల్ అథారిటీ ఆఫ్ సివిల్ ఏవియేషన్ (GACA) వెల్లడించింది.
దాడిలో గాయపడిన వారిని వెంటనే పలు ఆసుపత్రులకు తరలించి అవసరమైన వైద్య చికిత్స అందిస్తున్నట్లు అధికారులు తెలిపారు. దాడి కారణంగా విమానాశ్రయంలో ఆస్తులకు జరిగిన నష్టంపై అంచనా వేస్తున్నట్లు పేర్కొన్నారు.

మరోవైపు, యెమెన్‌కు చెందిన హౌతీ తిరుగుబాటు సంస్థ ఆదివారం రాత్రి రియాద్ విమానాశ్రయంపై గత 24 గంటల్లో దాడులు జరిపినట్లు ప్రకటించింది. తమ సైనిక ప్రతినిధి యాహ్యా సరీఅ ఈ విషయాన్ని వెల్లడిస్తూ, మొత్తం నాలుగు ప్రత్యేక ఆపరేషన్లు నిర్వహించినట్లు పేర్కొన్నారు.

ఈ దాడుల్లో రియాద్ విమానాశ్రయంతో పాటు దమ్మామ్ విమానాశ్రయాన్ని కూడా లక్ష్యంగా చేసుకున్నట్లు హౌతీ ప్రతినిధి తెలిపారు. అలాగే సౌదీ ప్రభుత్వ చమురు సంస్థ సౌదీ అరామ్‌కోకు చెందిన రెండు కేంద్రాలపై కూడా దాడులు చేసినట్లు ప్రకటించారు.
ఈ ఘటనతో సౌదీ అరేబియాలో భద్రతా పరిస్థితులపై ఆందోళనలు వ్యక్తమవుతున్నాయి. దాడికి సంబంధించిన పూర్తి వివరాలు, ఆస్తి నష్టం, భద్రతా చర్యలపై అధికారుల నుంచి మరిన్ని వివరాలు వెల్లడికావాల్సి ఉంది.