మస్కట్: ఒమన్ రాజధాని మస్కట్ గవర్నరేట్ పరిధిలో నిబంధనలను ఉల్లంఘించిన 17 పెట్రోల్ బంకులపై అధికారులు చర్యలు తీసుకున్నారు. వాణిజ్యం, పరిశ్రమలు, పెట్టుబడుల ప్రోత్సాహక మంత్రిత్వ శాఖ  తనిఖీల్లో ఈ ఉల్లంఘనలను గుర్తించినట్లు వెల్లడించింది. వివిధ వాణిజ్య, సేవా సంస్థలపై తీసుకున్న నియంత్రణ చర్యలకు సంబంధించి మంత్రిత్వ శాఖ అధికారిక ప్రకటన విడుదల చేసింది. ప్రాథమిక తనిఖీల్లో 17 ఇంధన విక్రయ కేంద్రాల్లో నిబంధనల ఉల్లంఘనలు గుర్తించినట్లు తెలిపింది. అయితే, సంబంధిత సమస్యలను ఇప్పటికే సరిదిద్దినట్లు పేర్కొంది.

ఆకస్మిక తనిఖీలు కొనసాగింపు

పెట్రోల్ బంకుల్లో నిబంధనల అమలును పర్యవేక్షించేందుకు అధికారులు క్రమం తప్పకుండా తనిఖీలు నిర్వహిస్తున్నారని మంత్రిత్వ శాఖ వెల్లడించింది. ముందస్తు సమాచారం లేకుండా ఆకస్మిక తనిఖీలు కూడా చేపడుతున్నట్లు తెలిపింది. వాణిజ్య, సేవా సంస్థలు ప్రభుత్వ నిబంధనలను తప్పనిసరిగా పాటించేలా చూడటం, సేవల నాణ్యతను మెరుగుపరచడం, వినియోగదారుల హక్కులను పరిరక్షించడం ఈ చర్యల ప్రధాన ఉద్దేశమని స్పష్టం చేసింది.

సనద్ సర్వీస్ సెంటర్ల లైసెన్సులు రద్దు

లైసెన్సులు రద్దు చేసిన సనద్ సర్వీస్ సెంటర్ల (Sanad Service Centres) వ్యవహారంపైనా మంత్రిత్వ శాఖ వివరణ ఇచ్చింది. పదేపదే నిబంధనలను ఉల్లంఘించడం, అధికారులు గతంలో నోటీసులు జారీ చేసి సరిదిద్దుకునేందుకు అవకాశాలు కల్పించినప్పటికీ సమస్యలను పరిష్కరించకపోవడంతో ఈ నిర్ణయం తీసుకున్నట్లు తెలిపింది.

ఫిర్యాదుల కోసం ‘తజావోబ్’

వాణిజ్య సంస్థలు లేదా సేవా కేంద్రాలకు సంబంధించి ఏవైనా సమస్యలు, ఉల్లంఘనలు గమనిస్తే ప్రజలు జాతీయ ఫిర్యాదుల వేదిక ‘తజావోబ్’ (Tajawob) ద్వారా అధికారులకు తెలియజేయాలని మంత్రిత్వ శాఖ సూచించింది. వినియోగదారుల హక్కులను కాపాడటంతో పాటు, వ్యాపార సంస్థల్లో నిబంధనల అమలును మరింత పటిష్ఠం చేసేందుకు ప్రజల సహకారం అవసరమని అధికారులు పేర్కొన్నారు.