మస్కట్‌: ఒమన్‌లో భారత సంప్రదాయ వైద్య విధానాలు, సంపూర్ణ ఆరోగ్య సంరక్షణపై అవగాహన పెంపొందించే లక్ష్యంతో ఇండియా–ఒమన్ ఆయుష్‌ (AYUSH) సమాచార కేంద్రాన్ని ప్రారంభించారు. ఆదివారం దర్సైట్‌లోని కిమ్స్‌ హెల్త్‌ ఆసుపత్రిలో ఈ కేంద్రాన్ని ప్రారంభించారు. ఒమన్‌లో భారత రాయబారి ప్రశాంత్‌ పిసే ఈ కేంద్రాన్ని ప్రారంభించారు. ఈ కార్యక్రమంలో కిమ్స్‌ హెల్త్‌ ఒమన్‌ ప్రాంతీయ చీఫ్‌ ఆపరేటింగ్‌ ఆఫీసర్‌ డాక్టర్‌ అమీర్‌ ముస్తఫాతో పాటు భారతీయ సమాజ ప్రతినిధులు, భారత్‌కు స్నేహపూర్వకంగా ఉండే ఒమన్‌ పౌరులు పాల్గొన్నారు.

మస్కట్‌లోని భారత రాయబార కార్యాలయం, కిమ్స్‌ హెల్త్‌ మెడికల్‌ సెంటర్‌ సంయుక్తంగా ఈ కార్యక్రమాన్ని చేపట్టాయి. భారత ప్రభుత్వ ఆయుష్‌ మంత్రిత్వ శాఖ ఆధ్వర్యంలో ఈ కేంద్రం ఏర్పాటైంది. 2025 డిసెంబర్‌లో భారత ప్రధాని నరేంద్ర మోదీ ఒమన్‌ పర్యటనకు ముందు ఈ కార్యక్రమానికి సంబంధించిన ఒప్పందం ఖరారైంది. భారత సంప్రదాయ వైద్య విధానాలు, సంపూర్ణ ఆరోగ్య సంరక్షణకు సంబంధించిన విశ్వసనీయ సమాచారాన్ని ప్రజలకు అందించేందుకు ఈ కేంద్రాన్ని ప్రత్యేక వేదికగా రూపొందించారు. ప్రారంభోత్సవంలో భాగంగా రిబ్బన్‌ కటింగ్‌తో పాటు ప్రారంభ ఫలకాన్ని ఆవిష్కరించారు.

భారత్‌–ఒమన్‌ సంబంధాలు మరింత బలోపేతం

ఈ సందర్భంగా భారత రాయబారి ప్రశాంత్‌ పిసే మాట్లాడుతూ.. ఈ చొరవ భారత్‌–ఒమన్‌ మధ్య దీర్ఘకాలంగా కొనసాగుతున్న స్నేహ సంబంధాలను మరింత బలోపేతం చేస్తుందని తెలిపారు. సంప్రదాయ వైద్య విధానాలపై ప్రజల్లో అవగాహన పెంపొందించడంతో పాటు, సంపూర్ణ ఆరోగ్య సంరక్షణ పట్ల ఇరు దేశాలకు ఉన్న ఉమ్మడి నిబద్ధతను ఈ కేంద్రం ప్రతిబింబిస్తుందని పేర్కొన్నారు. ఆయుర్వేదం, యోగా, యునాని, సిద్ధ, హోమియోపతి వంటి ఆయుష్‌ వైద్య విధానాలు వేల సంవత్సరాలుగా అభివృద్ధి చెందిన భారత సంప్రదాయ వైద్య విజ్ఞానంలో భాగమని ఆయన వివరించారు. వ్యాధుల నివారణ, ఆరోగ్యకరమైన జీవన విధానాలకు ఈ విధానాలు ప్రాధాన్యతనిస్తాయని తెలిపారు. ఒమన్‌లో నివసించే ప్రజలకు వీటిపై ప్రామాణికమైన సమాచారం అందించడంలో ఈ కేంద్రం కీలక పాత్ర పోషిస్తుందని ఆశాభావం వ్యక్తం చేశారు.

ఆయుష్‌ పరిధిలో ఆయుర్వేదం, యోగా, ప్రకృతి వైద్యం, యునాని, సిద్ధ, హోమియోపతి వైద్య విధానాలు ఉన్నాయి. వీటిని అంతర్జాతీయ స్థాయిలో ప్రోత్సహించేందుకు భారత ప్రభుత్వ ఆయుష్‌ మంత్రిత్వ శాఖ కృషి చేస్తోంది. మస్కట్‌లో ఏర్పాటు చేసిన ఈ సమాచార కేంద్రం ద్వారా ఆయుష్‌ వైద్య విధానాలపై విశ్వసనీయ సమాచారం అందించడంతో పాటు, ప్రజల్లో అవగాహన పెంపొందించనున్నారు.