దోహా: ఖతార్‌లో నివాసితులు తమ ఐడీ కార్డులపై ఉన్న ఫొటోలను మార్చుకునేందుకు కొత్త సేవను అందుబాటులోకి తీసుకురావడానికి ఖతార్ అంతర్గత వ్యవహారాల మంత్రిత్వ శాఖ (MOI) సిద్ధమవుతోంది. దేశంలో ఆమోదం పొందిన ఫొటో స్టూడియోల ద్వారా ఈ సేవను అందించనున్నారు. ఈ సేవకు సంబంధించి అవసరమైన సాంకేతిక ఏర్పాట్లను మంత్రిత్వ శాఖ ఇప్పటికే పూర్తి చేసింది. MOI అధికారిక వెబ్‌సైట్‌తో పాటు మెట్రాష్‌ (Metrash) యాప్‌లోని ప్రత్యక్ష సేవా వ్యవస్థల్లోనూ ఈ సదుపాయాన్ని సిద్ధం చేసింది.

ఈ సేవ అమలుకు ముందు, ఫొటో స్టూడియోల యజమానుల కోసం MOI అవగాహన సదస్సును నిర్వహించింది. ఐడీ కార్డు ఫొటోలను మార్చుకునే విధానం, దరఖాస్తుల సమర్పణ ప్రక్రియ, పాటించాల్సిన సాంకేతిక నిబంధనలపై వారికి వివరించారు.ఈ కార్యక్రమంలో జనరల్ డైరెక్టరేట్ ఆఫ్ పాస్‌పోర్ట్స్‌కు చెందిన మేజర్ మహమ్మద్ అలీ మహమ్మద్, జనరల్ డైరెక్టరేట్ ఆఫ్ కమ్యూనికేషన్స్ అండ్ ఇన్ఫర్మేషన్ సిస్టమ్స్‌కు చెందిన ఫస్ట్ లెఫ్టినెంట్ ఇంజినీర్ అలీ హసన్ అబ్దుల్‌రహీమ్ పాల్గొని వివరాలు వెల్లడించారు.

ఈ సందర్భంగా మేజర్ మహమ్మద్ అలీ మహమ్మద్ మాట్లాడుతూ.. ప్రజలకు అందించే సేవలను నిరంతరం మెరుగుపరచడమే జనరల్ డైరెక్టరేట్ ఆఫ్ పాస్‌పోర్ట్స్ లక్ష్యమని తెలిపారు. ప్రభుత్వ, ప్రైవేటు రంగాలకు చెందిన వివిధ సంస్థల సహకారంతో ప్రక్రియలను సరళతరం చేయడం, సేవలు మరియు జారీ చేసే పత్రాల నాణ్యతను పెంచడం, ఆమోదిత ప్రమాణాలను పాటించడం కోసం కృషి చేస్తున్నట్లు పేర్కొన్నారు.

టెక్నికల్, లాజిస్టికల్ అవసరాలన్నింటినీ ఫొటో స్టూడియోల యజమానులతో సమన్వయం చేసుకుంటూ పూర్తిగా పరిశీలించిన తర్వాత ఈ సేవను అధికారికంగా ప్రారంభిస్తామని MOI వెల్లడించింది. ఈ సేవ ప్రారంభమైతే, ఖతార్ నివాసితులు తమ ఐడీ కార్డులపై ఫొటోలను మార్చుకునేందుకు ఆమోదిత ఫొటో స్టూడియోల ద్వారా కొత్త సదుపాయం అందుబాటులోకి రానుంది. అయితే, సేవ ప్రారంభ తేదీని మంత్రిత్వ శాఖ ఇంకా అధికారికంగా ప్రకటించలేదు.