అబుదాబి: యూఏఈకు ప్రయాణించే భారతీయులు తగిన మెడికల్‌ ఇన్సూరెన్స్‌ తీసుకోవాలని అబుదాబిలోని భారత రాయబార కార్యాలయం, దుబాయ్‌ సహా ఉత్తర ఎమిరేట్స్‌లోని భారత కాన్సులేట్‌ జనరల్‌ సూచించాయి. అనుకోని అనారోగ్యం లేదా వైద్య అత్యవసర పరిస్థితులు ఎదురైతే భారీ వైద్య ఖర్చులు భరించాల్సి వస్తుందని హెచ్చరించాయి. యూఏఈలో వైద్య అత్యవసర పరిస్థితులను ఎదుర్కొన్న పలువురు భారతీయులకు భారీగా ఆసుపత్రి బిల్లులు వచ్చినట్లు తమ దృష్టికి వచ్చిందని భారత మిషన్లు తెలిపాయి. తగిన బీమా సౌకర్యం లేకపోవడంతో బాధితులు, వారి కుటుంబ సభ్యులు ఆర్థిక ఇబ్బందులు ఎదుర్కొంటున్నారని పేర్కొన్నాయి.

ప్రయాణానికి ముందే బీమా తీసుకోవాలి

విజిట్‌ వీసా లేదా పర్యాటక ప్రయోజనాల కోసం యూఏఈకి వెళ్లే భారతీయులు ప్రయాణం ప్రారంభించే ముందే తగిన వైద్య బీమా తీసుకోవాలని సూచించాయి. అనుకోని వైద్య అత్యవసర పరిస్థితుల్లో నగదు చెల్లించకుండానే చికిత్స పొందే సదుపాయం (క్యాష్‌లెస్‌) ఉండేలా చూసుకోవాలని తెలిపాయి. అవసరమైతే రోగిని యూఏఈ నుంచి భారత్‌కు తరలించే వైద్య రవాణా ఖర్చులు (మెడికల్‌ రీపాట్రియేషన్‌) కూడా బీమా పరిధిలోకి వస్తాయో లేదో నిర్ధారించుకోవాలని స్పష్టం చేశాయి.

ఇప్పటికే యూఏఈలో ఉంటున్నవారికీ సూచనలు

ఉద్యోగ వీసాలపై యూఏఈలో నివసిస్తున్న భారతీయులు, వారిపై ఆధారపడిన కుటుంబ సభ్యులు తమ వద్ద ఉన్న వైద్య బీమా పాలసీలను మరోసారి పరిశీలించాలని భారత మిషన్లు కోరాయి. యూఏఈలో అయ్యే వైద్య ఖర్చులతో పాటు, అవసరమైన సందర్భంలో భారత్‌కు తరలించే ఖర్చులను కూడా ప్రస్తుత బీమా కవర్‌ చేస్తుందో లేదో తనిఖీ చేసుకోవాలని సూచించాయి.

బీమా నిబంధనలు ముందుగానే తెలుసుకోవాలి

యూఏఈకి వెళ్లే ముందు లేదా అక్కడ నివసిస్తున్నప్పుడు ప్రస్తుత బీమా పాలసీ పరిధిని పూర్తిగా తెలుసుకోవడం అత్యంత ముఖ్యమని ఈ సూచనలు స్పష్టం చేస్తున్నాయి. వైద్య అత్యవసర పరిస్థితులకు వర్తించే నిబంధనలు, క్యాష్‌లెస్‌ చికిత్స సౌకర్యం, భారత్‌కు వైద్య తరలింపు ఖర్చుల కవరేజీ వంటి అంశాలను ముందుగానే నిర్ధారించుకోవడం ద్వారా అనుకోని ఆర్థిక భారాన్ని తగ్గించుకోవచ్చని భారత రాయబార కార్యాలయాలు సూచించాయి.